د طالبانو ویاند ذبیح الله مجاهد په یوه تازه ټویټ کې ويلي، چې د کابل ـ کندهار پر لاره د تېرې شپې د موټرو د ټکر خونړۍ دوه پېښې څېړي چې په راتلونکي کې مخنیوی ترې وشي. هغه وايي، دغو پېښو کې ۵۲ تنه مړه او ۶۵ نور ټپیان شوي.
د طالبانو رسمي ویاند ذبیح الله مجاهد نن پنجشنبه د (لیندۍ ۲۹مه) په یوه تازه ټویټ کې ويلي، چې د کابل ـ کندهار پر لاره د تېرې شپې د موټرو د ټکر خونړۍ دوه پېښې څېړي چې په راتلونکي کې له دا ډول پیښو مخنیوی وکړي.هغه په ایکس پاڼه د یوې خبرپاڼې په خپرولو سره ویلي، چې په دغې پېښه کې ۵۲ تنه مړه او ۶۵ نور ټپیان شوي.تر دې وړاندې د طالبانو تر واک لاندې باختر اژانس په دوو ټویټونو کې دوه ډوله ارقام خپاره کړي چې د ذبیح مجاهد له خپرو شویو شمېرو سره توپیر لري.مجاهد په خبرپاڼه کې زیاتوي چې اړوند ارګانونو ته په جدي ډول سپارښتنه شوې چې د دغو پېښو لامل معلوم او په راتلونکي له داسې ناورینونو مخنیوی وشي.
کابل کې د ترکیې سفارت په یوه ټویټ کې د کابل ـ کندهار پر لاره د دغې پېښې په اړه خواشیني څرګنده کړې او ټپیانو ته یې د بیړنۍ روغتیا غوښتنه کړې.
په هغو ویډیو ګانو او انځورونو کې چې افغانستان انټرنشنل ته رسیدلي ښکاري چې د لویو لارو د سورلۍ لوی بسونه ویجاړ شوي پراته او په وینو کې لت پت پراته ټپیان زګېروي کوي.
دا لومړی ځل نه دی چې په افغانستان کې پر لویو لارو د موټرو د ټکر په پېښو کې لسګونو کسانو ته مرګ ژوبله اوړي، تر دې وړاندې پر داسې لارو د موټرو په ټکر کې خلکو ته درنه مرګ ژوبله اوښتې وه
