د امریکا دفاع وزارت د پنجشنبې په ورځ ویلي، چې په سوریه کې یې د داعش پر وړاندې د مبارزې لپاره د خپلو سرتېرو شمېر له ۹۰۰ څخه ۲۰۰۰ ته لوړ کړی دی. د پنټاګون په وینا، د بشار الاسد د رژیم له نسکورېدو مخکې د امریکايي پوځیانو شمېر زیات شوی و.
د امریکا د دفاع وزارت ویاند پاټ رایډر د پنجشنبې په ورځ خبریالانو ته وویل چې دی نه پوهیږي چې د عسکرو شمیر څه وخت دوه زرو ته ورسید، خو په خبره یې ښايي دا د سوریې د ولسمشر بشارالاسد د رژیم له نسکوریدو مخکې وي.
متحده ایالاتو په تیرو کلونو کې ویلي و، چې په سوریه کې ۹۰۰ سرتیري لري چې د سیمه ییزو کردانو سره کار کوي چې د داعش د بیا راڅرګندیدو مخه ونیسي.
په سوریه کې د امریکايي ځواکونو دوه برابره ډېریدو ته په اشارې سره، د پنټاګون ویاند وویل چې «دغه اضافي ځواکونه لږ تر لږه څو میاشتې مخکې په سوریه کې وو.»
هغه وویل چې د سرتیرو زیاتوالی د لنډ مهال لپاره دی او دوی په سوریه کې د داعش پر وړاندې د امریکا د عملیاتو په موخه ځای پر ځای شوي دي.
د ولسمشر جوبایډن ادارې ویلي، چې امریکايي ځواکونه به په سوریه کې پاتې شي.
متحده ایالاتو په دې وروستیو کې په سوریه کې د داعش پر هدفونو هوايي بریدونه د دې اندیښنو له امله د پام وړ زیات کړي دي چې د واک په تشه کې اورپکې ډلې پرېنږدي چې ځان بیا جوړ کړي.
د امریکا منتخب ولسمشر ډونالډ ټرمپ د خپلې دندې په لومړۍ دوره کې هڅه وکړه چې له سوریې څخه خپل ځواکونه وباسي.
لکه څنګه چې ټرمپ دا مهال سپینې ماڼۍ ته د راستنیدو لپاره چمتووالی نیسي، هغه ویلي، چې په سوریه کې د امریکایي ځواکونو د زیاتوالي ملاتړ نه کوي.
