د برازیل په سوېل ختیځ کې د یوه مساپر وړونکي بس او یوې لارۍ تر منځ د ټکر له امله لږ تر لږه ۳۸ کسان مړه شوي او اوه نور بیا ټپیان دي. د برازيل ولسمشر لویز اناسیو لولا دا سلوا د خواخوږۍ په څرګندولو سره دغه پېښه «يوه تراژيدي» بللې ده.
بس له ساو پاولو څخه د شمال ختیځ د باهیا ایالت د ویتوریا دا کانکویستا ښار ته روان و.
دغه بس د یوې لارۍ سره د ټکر په پایله کې اور اخیستی، چې له امله یې په دغه بس کې سپرو ۴۵ سپرلیو ته مرګژوبله اوښتې دي.
په مړو شویو کسانو کې د بس چلوونکی او یو ماشوم هم شامل دی.
ویل کېږي، چې د بس د ټایر د خرابېدو له امله یې چلوونکي کنټرول له لاسه ورکړ او له لارۍ سره ټکر شو.
چارواکي وايي، یو بل موټر هم له بس سره ټکر کړی؛ خو مساپر یې ژوندي پاتې دي.
د ځايي رسنیو په وینا، دا له ۲۰۰۷ کال راهیسې په برازیل کې تر ټولو خونړۍ ترافیکي پېښه ده.
