عایشه الدبس د سوریې د ښځو چارو د مسوولې په توګه وټاکل شوه. د سوریې موقت حکومت په داسې حال کې نوموړې د ښځو د چارو د مسوولې په توګه وټاکله، چې تر دې وړاندې په نوي جوړښت کې د ښځو د څنډې کولو په اړه اندېښنې ډېرې وې.
عایشه الدبس لومړنۍ مېرمن ده، چې د تحریر شام په مشرۍ د سوریې د نوي حکومت په چوکاټ په رسمي توګه ګومارل کېږي.
الدبس د بشري حقونو او د مدني ټولنې فعاله هم ده.
نوموړې تر دې وړاندې د سوریې په ادلب او همداراز په ترکیه کې له سوري کډوالو سره بشردوستانه مرستې کولې.
له دغې ټاکنې وروسته عایشه الدبس په یوې مرکه کې اعلان وکړ، چې د سوریې په نوي حکومت کې د وړتیا پربنسټ په ټولو برخو کې ښځو ته فرصتونه برابرېږي.
مېرمن الدبس الجزیرې ته وویل، چې د سوریې له ټولو ولایتونو او قومونو څخه به مېرمنې د نوي حکومت په چوکاټ کې په ملي کنفرانس کې فعاله رول ولوبوي.
نوموړې د ښځو چارو دفتر او د یوې ښځې ریاست د سوریې د ښځو د راتلونکي په اړه ټولو پوښتنو ته ځواب وباله.
نړۍواله ټولنه د سوریې د نوو مشرانو د پخوانۍ القاعده شبکې غړیتوب او د دوی د سخت دریځو ایډیالوژیکو باورونو په نظر کې نیولو سره اندیښنه درلوده، چې دویه به هم د طالبانو په څېر د ښځو حقونه سلب کړي.
د سوريې د اسلامي ياغيانو له بريا سره، طالبانو د بشارالاسد د مخالفانو په ځانګړي ډول د تحریر شام ډلې د بریا هرکلی وکړ او هیله یې څرګنده کړه، چې دغه ډله په سوريه کې اسلامي حکومت ټينګ کړي.
خو د تحریر شام ډلې مشر احمد اشرع بیا له بي بي سي نیوز سره په مرکه وویل، چې نه غواړي په سوریه کې د طالبانو د حکومت په څېر حکومت جوړ کړي.
نوموړي ټینګار وکړ، چې د طالبانو د مشر برخلاف به د ښځو او نجونو د زده کړو مخه و نه نیسي.
اشرع همداراز زیاته کړه، چې افغانستان او سوریه دوه هېوادونه له بېلابېلو سنتونو سره دي.
