ملګري ملتونه: په افغانستان کې د نړۍوالو مالي مرستې لا هم محدودې دي
د افغانستان لپاره د ملګرو ملتونو د ځانګړي استازي مرستیال انډریکا راتواته ویلي، چې په افغانستان کې د نړۍوالو مرستې لا محدودې دي.
د افغانستان لپاره د ملګرو ملتونو د ځانګړي استازي مرستیال انډریکا راتواته ویلي، چې په افغانستان کې د نړۍوالو مرستې لا محدودې دي.
تسنیم خبري اژانس د ښاغلي راتواته له قوله راپور ورکړی، چې نړۍواله ټولنه د نړۍ له بېلابېلو ناورینونو سره لاس او ګرېوان ده او سرچینې یې وېشل شوې دي.
نوموړي اندېښنه څرګنده کړې، چې له افغانستان سره به بشري مرستې تر دې هم راکمې شي، چې اغېزې به یې ویجاړونکي وي.د راپورونو له مخې، اوسمهال د افغانستان ۲۳ میلیونه وګړي بشردوستانه مرستو ته اړتیا لري او له دې سره - سره ورځ تر بلې له افغانستان سره د نړۍوالو بنسټونو بشري مرستې هم د کمېدو په حال کې دي.پر افغانستان د طالبانو له بیا ځلې واکمنېدو بیا په ځانګړې توګه له ګاونډیو هېوادونو څخه د زرګونو افغان کډوالو ستنېدل او د دغه هېواد په یو شمېر ولایتونو کې طبیعي ناورینونه لکه زلزلې او سېلابونه بشري اړتیاوې زیاتې کړي دي.یادو پېښې د زرګونو افغانانو د بې ځایه کېدو لامل هم شوی دی، چې د ژمي په را رسېدو سره دغه بې ځایه شوي کډوال د سرپناه له نه شتون سره مخ دي.د کډوالو په چارو کې د ملګرو ملتونو عالي کمېشنري وایي، چې اوسمهال کابو ۶،۶ میلیونه کسان په افغانستان کې په کافي اندازه سرپناه نه لري.بلخوا، تر دې وړاندې د خوړو نړۍوال پروګرام هم اعلان کړی و، چې په روان کال کې به د بودیجې د کمښت له امله یوازې له ۶ میلیونه کسانو سره بېړنۍ مرستې وکړي.دغه سازمان دا هم ویلي و، چې د افغانستان اوسنیو شرایطو ته په کتو سره دغه هېواد د راتلونکو شپږو میاشتو لپاره له اړمنو کسانو سره د مرستې په موخه ۷۱۸ میلیون ډالرو ته اړتیا لري.
