د سوریې د بهرنیو چارو وزیر: د ښځو ترڅنګ درېږو او له حقونو یې ملاتړ کوو
د سوریې د نوي حکومت د بهرنیو چارو وزیر اسعد حسن شیباني وایي، چې دوی به د دغه هېواد د ښځو ترڅنګ ودرېږي او له حقونو به یې ملاتړ وکړي.
د سوریې د نوي حکومت د بهرنیو چارو وزیر اسعد حسن شیباني وایي، چې دوی به د دغه هېواد د ښځو ترڅنګ ودرېږي او له حقونو به یې ملاتړ وکړي.
نوموړي په خپل اېکس کې لیکلي: «د دې هېواد ټول چارواکي د ښځو ترڅنګ درېږي او د دوی له حقونو به په هر اړخیزه توګه ملاتړ وشي.»
ښاغلي شیباني ټينګار کړی، چې دوی په ټولنه کې د ښځو په پیاوړتیا او فعاله رول باور لري.
د سوریې د بهرنیو چارو وزیر دغه خبرې په داسې حال کې کوي، چې څو ورځې وړاندې د دغه هېواد نوي حکومت عایشه الدبس د سوریې د ښځو چارو د مسوولې په توګه وټاکله.
تر دې وړاندې د سوریې په نوي جوړښت کې د ښځو د څنډې کولو په اړه اندېښنې ډېرې وې.
عایشه الدبس لومړنۍ مېرمن ده، چې د تحریر شام په مشرۍ د سوریې د نوي حکومت په چوکاټ په رسمي توګه ګومارل کېږي.
د سوريې د اسلامي ياغيانو له بريا سره، طالبانو د بشارالاسد د مخالفانو په ځانګړي ډول د تحریر شام ډلې د بریا هرکلی وکړ او هیله یې څرګنده کړه، چې دغه ډله په سوريه کې اسلامي حکومت ټينګ کړي.
خو د تحریر شام ډلې مشر احمد اشرع بیا له بي بي سي نیوز سره په مرکه وویل، چې نه غواړي په سوریه کې د طالبانو د حکومت په څېر حکومت جوړ کړي.
نوموړي ټینګار وکړ، چې د طالبانو د مشر برخلاف به د ښځو او نجونو د زده کړو مخه و نه نیسي.
اشرع همداراز زیاته کړه، چې افغانستان او سوریه دوه هېوادونه له بېلابېلو سنتونو سره دي.
