د تېر جمهوري نظام د ملي امنیت پخواني رییس رحمت الله نبیل د طالبانو له لورې په نا دولتي موسسو کې د ښځینه کارکوونکو په کار بندیز ډارونکی بللی او وایي، چې د ښځينه کارکوونکو پر وړاندې د محدودو پالیسیو دوام به خورا بدې پایلې ولري.
د طالبانو اقتصاد وزارت د دغه ډلې د مشر ملا هبت الله د تازه فرمان له مخې په یو مکتوب کې نادولتي موسسو ته خبرداری ورکړی، چې ژر تر ژره دې ښځینه کارکوونکې له دندو لرې کړي.
د طالبانو اقتصاد وزارت له لوري اکبر موسسې ته استول شوي مکتوب کې کورنیو او بهرنیو اینجوګانو ته ګواښ شوی، چې د سرغړونې په صورت کې به یې جوازونه لغوه کړي او دفترونه به یې هم ور وتړي.
رحمت الله نبیل په خپل اېکس د طالبانو دغه اقدام ته په غبرګون کې لیکلي: «د طالبانو له لورې په ښځو او نجونو محدودیتونه د دې پر ځای چې تعرضي اقداماتو سره موافقت وکړي، تبعیضي کړنې تقویه کوي او باید د دې ډول محدودیتونو د بشپړ بېرته راګرځولو لپاره یو متحد او غیر منصفانه هڅه وشي. د دې شرایطو خاموشي یا اطاعت د دې بې عدالتیو دوام او ډېرېدو خطر لري».
یاده دې وي، چې طالبانو له دغه پرېکړې وړاندې نادولتي موسسو ته په شفاهي بڼه د ښځو د کار کولو په اړه سپارښتنې کړې وې او زیات شمېر موسسو په دفترونو کې د دغه سپارښتنو له مخې د نجونو د کار ځایونه له نارینه و جلا کړي وو او حجاب هم پرې جبري شوی وو.
د طالبانو بیا واکمنېدو سره دغې ډلې په افغانستان کې د ښځو پر وړاندې سخت قوانین تطبیق کړي دي.
د ښځو او نجونو پر زده کړو بندیزونه، له تفریحي ځایونو راګرځول، له محرم پرته د سفر محدودیتونه، د ښځو د ټولنیزو او سیاسي مشارکت مخنیوی او لسګونه نور موارد هغه څه دي، چې افغان مېرمنې ورسره لاس او ګرېوان دي.
سره له دې چې نړۍوالو او د ښځو د حقونو فعالانو په ځلونو پر طالبانو غږ کړی، څو دغه محدودیتونه لرې کړي، خو طالبانو د دې ترڅنګ چې د ښځو پروړاندې خپل چلند بدل کړی نه دی، سخت کړی هم دی.
