د افغانستان د ډيپلوماتیکو استازولیو د همغږۍ شورا په سوېلي کوریا کې د جېجو هوايي شرکت الوتکې د پرېوتو په پېښه خواشیني څرګنده کړې. تیره ورځ په سوېلي کوریا کې د یوې الوتکې د لوېدو په پېښه کې ۱۷۹ کسان مړه شول.
د افغانستان د ډيپلوماتیکو استازولیو د همغږۍ شورا په خپرې شوې خبرپاڼه کې په دې تړاو راغلي، چې د کوریا حکومت او د هغو کسانو کورنیو او خپلوانو ته چې په دغې غمجنې پېښه کې مړه شوي خپله ژوره خواخوږي او ډاډګېرنه وړاندې کړې ده.
د افغانستان د ډيپلوماتیکو استازولیو د همغږۍ شورا دارنګه په دغې خبرپاڼه کې د پېښې ټپیانو ته د بېړنۍ او بشپړې روغتیا هیله کړې ده.
د خبرپاڼې په وروستۍ کرښه کې راغلي: «موږ په دې غمیزه خپله ژوره خواشیني څرګندوو او په دې سخت وخت کې د کوریا جمهوریت د خلکو تر څنګ ولاړ یو.»
له دغې پېښې وروسته تازه د سوېلي کوریا لنډمهاله ولسمشر چوی سانګ مک د دغه هېواد د ټول هوایي چلند عملیاتي سیسټم د بېړني خوندیتوب د پلټنې امر کړی.
د سوېلي کوریا دغه مساپر وړونکې الوتکه د دغه هېواد په موان هوايي ډګر کې د ښکته کېدو پر مهال له ځغاست لیکې ووتله او له یوه کانکریټي دیوال سره له ټکر وروسته وچاوده او اور یې واخیست.
په دې الوتکه کې ۱۸۱ تنه سپاره وو او یوازې دوه تنه یې ژوندي وتلي دي.
