د پاکستان حکومت پخواني وزیر ساجد حسین ویلي، له هغه مهاله چې په کورمه کې مذهبي تاوتریخوالي زور اخیستی، په پاړه چنار کې د دارو درملو د کموالي له امله ۱۲۸ ماشومان مړه شوي دي.
د شاوخوا ۸۰ ورځو راهیسې کورمې ته ټولې غځېدلې لارې تړل شوې او خلک نه شي کولای خپل ناروغان پېښور یا اسلام اباد ته ولیږدوي.
په کورمې ولسوالۍ کې د پخوا راهیسې د شیعه او سني مذهبو ډلو تر منځ د ځمکو او نورو مذهبي اختلافاتو له امله تاوتریخوالی پیښېده، خو ډېر ځله دغه تاوتریخوالی د محرم او ځینو نورو مذهبي ورځو پر مهال زیاتېده، خو دا پلا دغې جګړې له دوو میاشتو زیاتې اوږدې شوې او دواړو خواو په کې له سپکو او درنو وسلو کار واخیست چې یو بل ته یې درانه تلفات هم اړولي دي.
دغې جګړې د نومبر په میاشت کې له هغې وروسته زور واخیست چې د شیعه مذهبو په موټریز کاروان برید وشو او دواړو خواو ته د سر درانه زیانونه واوښتل.
تر دې وړاندې حکومت ویلي و، چې په دارو درملو یوه بار چورلکه یې سیمې ته استولې او ځیني بیړني ناروغان یې هم اسلام اباد او نورو ښارونو ته لیږدولي دي؛ خو بیا هم په سیمه کې خلک د دارو درملو له نشتوالي شکایت کوي.
د پاکستان په حکومت کې پخواني وزیر ساجد حسین د ډان ورځپاڼې ته ویلي، یوازې د پاړه چنار په مرکزي روغتون کې ۳۷ ماشومان د درملو د نشتوالي له امله مړه شوي دي.
ښاغلي توري ویلي: «که د ټولو روغتونونو شمېرې سره راټولې شي، نو د ۸۵ ورځو په ترڅ کې د مړو شویو ماشومانو شمېر ۱۲۸ ته رسیږي.»
نوموړي ویلي د لارو د بندېدو سره، په کورمې ولسوالۍ کې د ناروغانو وضعیت د اندېښنې وړ دی او تر څنګ یې خلک د خوړو او سون توکو له نشتوالي سره هم مخامخ شوي دي.
هغه وایي د زړه په رنځ اخته ناروغان او میندواره مېرمنې د درملو د کمي له امله مري چې دغه حالت تر ټولو دردونکی او خواشینونکی دی.
