شمالي کوریا ټرمپ ته د واک سپارلو وړاندې د امریکا پر ضد سخته تګلاره اعلان کړه
د شمالي کوریا مشر کېم جونګ اون ژمنه وکړه، چې د متحده ایالاتو پر ضد "تر ټولو سخت" پاليسي پلي کړي.
د شمالي کوریا مشر کېم جونګ اون ژمنه وکړه، چې د متحده ایالاتو پر ضد "تر ټولو سخت" پاليسي پلي کړي.
راپورونه وایي، چې د شمالي کوریا مشر دغه اقدام د متحده ایالاتو په ټاکنو کې بریالي نوماند ډونالډ ټرمپ ته د واک له سپارلو وړاندې ترسره کړی دی.
د متحده ایالاتو ضد دغې پالیسۍ په اړه ډېر جزیات نه دي په ډاګه شوي، خو ویل کېږي چې کېم جونګ اون د دفاعي ټیکنالوژۍ د پرمختګونو له لارې د نظامي وړتیا لوړولو لپاره دندې ټاکلي او د شمالي کوریا سرتېرو ته د نویو وړتیاوو په زیاتولو یې ټینګار کړی.
په شمالي کوریا کې واکمن کارګر ګوند په پنځه ورځينۍ ناسته کې کېم جونګ اون د متحده ایالات د کمونیزم ضد حکومت یاد کړ او ویې ویل، چې د متحده ایالاتو - سویلي کوریا او جاپان امنیتي ملګرتیا "د تیري لپاره اټومي نظامي بلاک" ته پراختیا ورکوي.
کېم جونګ اون ویلي، ټولو هغو اړخونو ته به کلک ځواب ورکړي چې د شمالي کوریا اوږدمهاله ملي ګټې او امنیت ګواښي.
د رسنیو د راپورنو له مخې د شمالي کوریا مشر ویلي: "دا واقعیت په روښانه ډول ښیې چې موږ باید کوم لوري ته لاړ شو او څه باید څنګه وکړو."
سپینې ماڼۍ ته د ټرمپ راتګ د شمالي کوریا سره د لوړې کچې ډیپلوماسۍ امکانات زیاتوي.
ډونالډ ټرمپ د خپلې لومړۍ ولسمشریزې دورې په جریان کې، د شمالي کوریا د اټومي پروګرام په اړه د خبرو اترو لپاره درې ځله کېم سره ولیدل، خو اوس کارپوهان په دې باور دي، چې د کېم او ټرمپ د خبرو د بیا پیلېدو احتمال ډېر نه ترسترګو کېږي، ځکه ټرمپ به لومړی د اوکراین او منځني ختیځ پر شخړو تمرکز وکړي.
د کارپوهان په وینا، د اوکراین په وړاندې د روسیې د جګړې لپاره د شمالي کوریا ملاتړ هم د ډیپلوماسۍ د بیا راژوندي کولو هڅو ته ننګونه ده.
