د رویټرز خبري اژانس د خبر له مخې سوریه له اوکراین سره د "ستراتیژیکو همکاریو" هیله لري. د سوریې د بهرنیو چارو نوي وزیر د دوشنبې په ورځ خپل اوکرایني سیال ته وویل ،چې کیېف په دمشق کې د روسیې د نفوذ کمېدو په ترڅ کې له نویو اسلامپالو واکمنانو سره د اړیکو د ټینګولو لپاره حرکت وکړي.
د سوریې د بهرنیو چارو نوي ټاکل شوي وزیر اسد حسن الشیباني د اوکراین د بهرنیو چارو وزیر اندري سیبیها ته وویل، «زموږ او اوکراین ترمنځ به په سیاسي، اقتصادي او ټولنیزو او علمي برخو کې ستراتیژیکه ملګرتیا موجوده وي.»
د اوکراین د بهرنیو چارو وزیر دوشنبې په ورځ یې په دمشق کې د سوریې له نوي واکمن احمد شرع سره هم وکتل.
اندري سیبیها وویل چې اوکراین به د سه شنبې په ورځ د اوړو شلو کښتیو له رسیدو وروسته سوریې ته د خوراکي توکو نورې مرستې هم ولېږي.
د اوکراین ولسمشر ولادیمیر زیلینسکي د تېرې جمعې په ورځ اعلان وکړ، چې سوریې ته د اوکراین د خوراکي مرستو لومړۍ چوپه چې ۵۰۰ مټریک ټنه غنم پکې شامل دي د کیېف د بشري مرستو د یوې برخې په توګه د ملګرو ملتونو د خوړو نړیوال پروګرام سره په همکارۍ دغه هېواد ته استول شوې ده.
