د پخواني جمهوري دولت د عدليې پخوانی وزیر او د مقاومت جبهې غړی فضل احمد معنوي وايي، چې د طالبانو د کډوالو چارو پخواني وزیر خلیل حقاني له مقاومت جبهې سره غیر مستقیم او پرلهپسې اړیکې درلودې.
نوموړي زیاته کړه، چې دغه اړیکې د پنجشېر د جګړو له پیل څخه تر هغه وخته روانې وې، چې پر حقاني ځانمرګی برید وشو.
معنوي دغه راز وویل، چې د مقاومت جبهې مشر احمد مسعود بیا له خلیل حقاني سره مستقیمې اړیکې نه درلودې.هغه د چهارشنبې په ورځ له افغانستان انټرنشنل سره په خبرو کې وویل، چې خلیل حقاني د جګړو پلوی نه و او هغه وخت چې په پنجشېر کې جګړې روانې وې، له هغه څخه یې پرلهپسې اړیکې ترلاسه کړي دي.ښاغلي معنوي زیاته کړه، چې له جګړو څخه د مخنیوي لپاره د حقاني هڅې تر وروستیو پورې دوام درلود.تر دې وړاندې په افغانستان کې د اروپایي اتحادیې پخواني مرستیال مایکل سمپل له افغانستان انټرنشنل سره په مرکه کې وویل، چې حقاني د پټو کورنیو او بهرنیو اړیکو له امله ترور شو.سمپل دغه راز وویل، چې د طالبانو مشر د حقاني په اړیکو شک درلود.هغه د حقاني ترور د طالبانو ترمنځ د خپلمنځیو ترینګلتیاوو له امله بللی و.د مقاومت جبهې لوړپوړي غړي فضل احمد معنوي هم د خلیل حقاني ترور د طالبانو د خپلمنځیو اختلافنونو له امله بللی دیحقاني تېره میاشت په کابل کې د یوې ځانمرګي برید له امله ووژل شو.معنوي په خپلو کې زیاته کړې، چې کندهاري طالبانو واک انحصار کړی او دا مسله د نورو ډلو د نارضایتۍ لامل شوی دی.نوموړي وړاندوینه کړې، چې د امریکا د نوي حکومت په رامنځته کېدو سره به له طالبانو سره مرستې بندې شي او یاده ډله نه شي کولی، چې د خپلو امنیتي او جهادي مدرسو لګښتونه د مالیاتو او ځمکنیو سرچینو څخه برابرې کړي.
