د پاکستاني رسنیو د راپور له مخې د خیبرپښتونخوا په کورمې ولسوالۍ کې له دوه نيمو مياشتو خونړۍ جګړې وروسته تېره ورځ د جګړې د ښکېلو غاړو تر منځ د سولې هوکړه لاسليک شوه، خو په ولسوالۍ کې د خوراکي توکو او درملو د کمي ناورین لا هم پخپل ځای پاتې دى.
په کوهاټ کې له څو ورځو راهیسې د امن په لويه جرګه کې د ګوندونو په استازيتوب ۴۵ کسانو لاسليکونه کړي دي. چې د جرګې د پرېکړې له مخې لومړی به اوربند کیږي، بیا به له دواړو لوریو وسلې راټولیږي او لومړنیو اړتیاوو پوره کولو ته به هڅه کیږي.
په تړونلیک کې ویل شوي چې که په کومه سیمه کې بیا هم کومه پېښه وشي نو د امن کمېټه به سملاسي فعاله شي. او دویم اړخ به یې په وړاندې د غچ اخیستو هڅه نه کوي.
د خېبرپښتونخوا سر وزیر علي امين ګنډاپور له ګوندونو غوښتنه کړې چې کرکه خپرونکي کسان له خپلو ګوندونو او ډلو څخه بهر کړي او په خپلو ډلو او ټولنو کې یووالی رامنځته کړي.
بل خوا د خیبرپښتونخوا د اطلاعاتو وزیر محمد علي سیف د پاړه چنار د پښتونخوا له نورو برخو سره نښلوونکې لویې لارې د پرانېستلو اعلان کړی او ویلي یې دي چې له شنبې ورځې څخه به دغه هڅې پیل شي.
د اطلاعاتو وزير وويل چې د موټرو ړومبی کاروان به د شنبي په ورځ پاړه چنار ته د درملو، خوراکي او د ژوند د نورو ضرورتونو سامان وړي. له دغه کاروان سره د تلونکو خلکو امنیت به نیول کیږي.
د یادونې وړ ده چې په کورمې ولسوالۍ کې د نومبر په ٢١مه د مساپرو پر کاروان د ډزو له پېښې وروسته حالات ترينګلي شوي و. له دغې غمجنې پېښې وروسته پاړه چنار د خیبرپښتونخوا له نورو برخو سره نښلوونکې یوازینۍ لاره له دوه نیمو میاشتو راهیسې تړل شوې، چې له امله یې په سیمه کې د درملو په ګډون د نورو اړینو توکو کمښت رامنځته شوی دی.
