د علامه طباطبايي پوهنتون مرستیالې د چهارشنبې په ورځ په تهران کې په یوه کنفرانس کې وویل چې د طالبانو له واکمنېدو وروسته ډېر شمېر پوهان له افغانستانه ایران ته کډوال شول. ماندانا تیشهیار، دوی انساني پانګه ګڼي او لویدیځو هیوادونو ته یې د دوی کډوالي د ایران په زیان وبلله.
د دغه پوهنتون استادې په «ایران کې د علمي شخصیتونو کډوالي، ننګونې او حل لارې» په یوه غونډه کې ویلي، چې ایران ته د افغانانو کډوالي په ۱۳۵۰ لسیزه کې پیل شوې او اوس د دوی دویم او دریم نسل په ایران کې ژوند کوي، چې په وینا یې هغوی په ایران کې زدهکړې کړې او لوی شوي دي.د ایرنا د راپور له مخې، تیشهیار وویل چې په افغانستان کې د طالبانو له واکمنۍ وروسته یوه څپه له دغه هېواده وتلې چې د «پوهنتونونو استادان، محصلان، ډاکټران، انجینران، وکیلان، اقتصاد پوهان، ټولنپوهان، خبریالان، لیکوالان او ورزشکاران په کې شامل دي ایران ته د بشري پانګې تر څنګ مالي پانګه هم له ځان سره لري».تیشهیار دې ته په اشارې سره چې دغه کسان له څه مودې وروسته د بیلابیلو دلایلو له مخې له ایرانه وځي وویل: «د هغوی د پاتې کېدو لپاره هیڅ ډول هڅه نه ده شوې، له ایران څخه د افغانانو د یادې ډلې کډوالي د دغه هیواد په ګټه نه ده او په اوږدمهال کې به د ایران په زیان تمامه شي. »د دغه پوهنتون استادې زیاته کړه چې له ایرانه د افغان کډوالو په وتلو سره به د دوی راتلونکی نسل له فارسي ژبې بې برخې شي. هغې وویل: «افغان کډوالو کولای شوای د ځینو مسلو لکه قاچاق، امنیت، له ترهګرۍ سره مبارزه، چاپیریال، د اقلیم بدلون، د اوبو د مسلې په حل کې له ایران سره مرسته وکړي.»په ورته وخت کې د علامه طباطبايي پوهنتون مرستیالې په افغانستان کې له زدهکړو څخه د ښځو او نجونو د مخنیوي مسلې ته په اشارې وویل، چې د «طالبانو له خوا د ښځو د زدهکړو مخنیوی به د دې لامل شي، چې په راتلونکي کې د دوی اولادونه په ښه توګه زدهکړې ونه کړي. چې زیان به یې ایران ته هم ورسیږي.»په تهران کې د دغه پوهنتون استادې په داسې حال کې د افغان کډوالو د ساتلو لپاره د هڅو په نشتوالي نیوکه کوي چې په تیرو میاشتو کې د ایران حکومت دغه هیواد کې د افغان کډوالو د راټولولو او ویستلو پراخ کمپاین پیل کړی دی.پر دې سربیره د کډوالو کورنیو د ماشومانو پر زدهکړو بندیزونه زیات شوي او د ایران په ډیرو ښارونو کې د افغانانو کار او ان اوسیدل هم منعه شوي دي.له افغان کډوالو سره د قانون د پلي کولو او په ځینو برخو کې د ایراني وګړو له خوا سختۍ او نامناسب چلند له امله ښايي ځینو کورنیو په ایران کې د پاتې کیدو په اړه فکر کړی وي. په وروستیو کلونو کې ډېرو افغانانو هڅه کړې چې د اروپايي هېوادونو، امریکا او استرالیا ته د تګ لارې خپلې کړي.
