امرالله صالح: د طالبانو جوړښت بهرنۍ پلان شوې معامله ده
د زرغون بهیر مشر او د تېر جمهوري نظام د ولسمشر لومړي مرستیال امرالله صالح ویلي، چې لومړيتوب یې د طالبانو له منګلو د افغانستان ژغورل دي.
د زرغون بهیر مشر او د تېر جمهوري نظام د ولسمشر لومړي مرستیال امرالله صالح ویلي، چې لومړيتوب یې د طالبانو له منګلو د افغانستان ژغورل دي.
نوموړی زیاتوي، چې د ملي یووالي ټینګښت یوازې د اساسي قانون تر سیوري لاندې او د خلکو په ارادې سره رامنځته کېدای شي.
امرالله صالح په خپل اېکس کې د طالبانو د اوسني نظام جوړښت بهرنۍ پلان شوې معامله یاده کړې او ویلي يې دي، چې د افغانستان د جغرافيې په اړه له اوسني وضعيت سره هېڅ تړاو نه لري.
صالح دغه راز لیکلي: «د افغانستان د داخلي اړیکو په چوکاټ کې موږ لویه جرګه درلوده چې د خلکو د ارادې څرګندونه ګڼل کېږي. هغه څه چې موږ په دود، قانون، اصولو او ارزښتونو کې نه لرو هغه اوسنی حالت دی».
نوموړی زیاتوي، چې طالبان دې په بې ځایه شور جوړولو ځانونه د محور په توګه نه ګڼي.
دا په داسې حال کې ده، چې ښاغلي صالح تر دې وړاندې د امریکا پر حکومت جدي تورونه پورې کړي وو.
نوموړي ادعا کړې وه، چې د ۲۰۲۱ کال له سپټمبر میاشتې راهیسې امریکا هره اوونۍ یا هرو لسو ورځو کې د طالبانو حکومت ته له ۴۰ میلیونو څخه تر ۸۰ میلیون ډالرو پورې نغدې پیسې ورکوي.
سربېره پر دې، په ۲۰۲۴ کال کې امریکا د «پایدونکي ټیکاو» په نوم د یو پروګرام له لارې طالبانو ته ۴۴۶ میلیون ډالره هم ځانګړي کړي دي.
صالح ټینګار کوي، چې دغه پروګرام او ورسره تړلې بودیجه مشکوک دی او د افغانستان د خلکو لپاره هېڅ ګټه نه لري.
