امریکا د غزې په جګړه کې د اسراییل لپاره د ۸ میلیارد ډالرو وسلو تړون تصویب کړ

د راپورونو له مخې، په دې بسته کې د جنګي جېټ مهمات، د توپخانې مرمۍ او د چورلکو توغندي شامل دي.
د وسلو دغه تصویب داسې مهال کېږي، چې د اکټوبر له پنځمې نېټې راهیسې د اسراییل پوځي عملیات د غزې د جبالیا د کډوالو په کمپ، بیت الاهیا او بیت حانون کې روان دي.
راپورونه وایي، چې په دې بسته کې د بې پیلوټه الوتکو په څېر د هوایی ګواښونو په وړاندې د دفاع لپاره له هوا څخه هوا ته ویشتونکي توغندي هم شامل دي.
د سرچینو په وینا، ښایي د دغه بستې زیاته برخه تجهیزات د متحده ایالاتو له زېرمو څخه ورکړل شي او پاتې به نوي تولید ته اړتیا ولري.
ددغه مرستو موخه د مهمو مهماتو او هوایي دفاعي سیسټمونو په ډکولو سره د اسراییل د اوږدمهاله امنیت پیاوړي کول دي.
تر دې وړاندې د متحده ایالاتو ولسمشر جوبایډن ویلي وو " اسراییل د نړۍوالو او بشردوستانه قوانینو سره سم د خپلو اتباعو د ساتنې حق لري. موږ به د اسراییلو د دفاع لپاره د اړتیا وړ ظرفیتونو چمتو کولو ته دوام ورکړو."
د بشري حقونو یو شمېر نړۍوالې ادارې او ځيني هېوادونه په اسراییل نیوکه کوي، چې د دغه هېواد پوځ پوځ په غزه کې د نسل وژنې جګړې ته دوام ورکړی دی.
د راپورونو له مخې، له ۲۰۲۳ کال څخه تر اوسه په دې سیمه کې اسراییلي پوځیانو ۴۵۶۰۰ کسان وژلي دي او لسګونه زره کسان یې ټپيان کړي دي.
یاده دې وي، چې د ملګرو ملتونو د امنیت شورا په غزې تړانګه کې د سمدستي اوربند غوښتنه کړې.
د نومبر په میاشت کې د جرمونو نړۍوالې محکمې په غزه کې د جنګي جرمونو او د بشریت ضد جرمونو په تور د اسراییل د لومړي وزیر بنیامین نتنیاهو او د دفاع پخواني وزیر یوف ګالنټ د نیولو امر هم صادر کړ.
اسراییل بیا په غزه کې د خپلو پوځي اقداماتو له امله د عدالت په نړۍواله محکمه کې د نسل وژنې قضیه هم لري