د کاناډا حکومت خپلو وګړو ته خبرداری ورکړی چې د ناامنیو، ترهګریزو بریدونو، وسله والو جګړو، د جرمونو د لوړې کچې او د طالبانو له خوا د بشري حقونو د پراخو سرغړونو له امله افغانستان ته سفر ونه کړي.
کاناډا وايي، په افغانستان کې امنیتي وضعیت لا هم بې ثباته او ګواښونکی دی.
د کاناډا حکومت ټینګار کړی چې په افغانستان کې یې کونسلي مرستې کمې کړې دي.
د کاناډا حکومت له لوري په خپره شوې خبرپاڼه کې چې د جمعې په ورځ د (مرغومي ۱۴مه) خپره شوې، ويل شوي چې په افغانستان کې د کاناډا سفارت خپل فعاليتونه ځنډولي دي. «په افغانستان کې زموږ کونسلي مرستې او نور ملاتړ او وړتیا خورا کمه شوې ده.»
د کاناډا حکومت خپلو وګړو ته ویلي چې که په افغانستان کې وي، خوندي ځای کې دې پاتې شي او د اړتیا پر مهال دې خوندي ځای ته د تګ لپاره له احتیاطه کار واخلي. په خبرپاڼه کې د کاناډا پر وګړو ټینګار شوی چې:«تاسو د خپل ځان او کورنۍ د خوندیتوب مسوولیت لرئ.»
واک ته د طالبانو تر رسیدو وروسته، د امریکا، استرالیا او برتانیا په ګډون یو شمېر نورو هېوادونو له خپلو وګړو وغوښتل چې افغانستان ته ولاړ نه شي.
د ۱۴۰۳ په زمري میاشت کې، د متحده ایاالتو د بهرنیو چارو وزارت په تکرار سره د امریکا له وګړو څخه وغوښتل چې د ترهګرۍ، ناقانونه نیونو د ګواښ له امله افغانستان ته سفر ونه کړي.
دغه وزارت وايي، په افغانستان کې ترهګرې ډلې فعالې دي او امریکايي وګړي له تښتونو او یرغمل کېدو له ګواښ سره مخ دي.
