د ننګرهار لپاره د طالبانو د کرنې اوبو لګولو او مالدارۍ ریاست ویلي، چې په دې ولایت کې د کبانو فارمونه د کال ۲۰۰ مټریک ټنه د کبانو غوښه تولیدوي. ویل کیږي، دغه فارمونه د تېر جمهوري حکومت پر مهال فعال شوي او په ګټه راغلي وو.
د طالبانو تر واک لاندې باختر اژانس نن شنبه د (مرغومي ۱۵مه) د ننګرهار لپاره د طالبانو د کرنې اوبو لګولو او مالدارۍ ریاست په حواله ویلي، چې په دې ولایت کې د کبانو فارمونه د کال ۲۰۰ مټریک ټنه د کبانو غوښه تولیدوي.
خبر زیاتوي چې دا مهال په دغه ولایت کې د کبانو روزلو په ۱۰۰ فعاله فارمونو کې ۳۰۰ کسان کار کوي.
ویل کیږي، د ننګرهار هوا او اقلیم ته په کتو د تېر جمهوري حکومت پر مهال د کبانو فارمونو ته ډیره پاملرنه وشوه چې ځايي سوداګرو په دې برخه کې پانګونې ته لېوالتیا وښودله او تر سلو پورې فارمونه په کې جوړ او د کبانو روزنه یې پیل کړه.
هغه مهال نامعلومو کسانو له دې امله ځینو فارمونو ته په پټه زهري مواد ور واچول او د ډیرو فارمونو کبان یې ووژل چې سوداګرو او د هغه وخت حکومت یې پړه پر پاکستان واچوله او ویل چې دغه هیواد نه غواړي افغانستان په خپلو پښو ودریږي.
د طالبانو د ننګرهار کرنې، اوبو لګولو او مالدارۍ مشر مولوي محمد ولي محسن وایي چې اوس هم هره ورځ نږدې لس ټنه د کبانو غوښه د پاکستان څخه د تورخم له لارې ننګرهار ته واردیږي.
مولوي محسن زیاته کړه چې: «اوسنی تولید د ننګرهار د اړتیاوو پوره کولو لپاره کافي نه دی، خو د دې برخې د پراختیا لپاره هڅې روانې دي. هغه د پانګوالو هڅونې ته اشاره وکړه او ویې ویل چې د کبانو د غوښې تولید په برخه کې پر ځان بسیاینې لپاره پانګونه اړینه ده.»
ننګرهار د کرنې او مالدارۍ په برخه کې یو مهم ولایت دی، چې د کبانو د تولید ترڅنګ په نورو برخو کې هم د ودې لپاره ګڼې پروژې پلي کړي. د کبانو غوښه د خوړو اړینه برخه ګڼل کېږي.
