د اوربند له ټینکېدو یوازې څو ساعته وړاندې اسراییلي پوځ د غزې تړانګې په سویل کې د رفح په شمالي او لویدیځو سیمو بریدونه کړي دي. د دغو بریدونو د زیانونو په اړه لا تر اوسه پورې څه نه دي ویل شوي.
الجزیرې راپور ورکړی، چې د دېر البلاح په مرکزي ښار او همدارنګه د خان یونس ښار ته نږدې د اسراییل د هوايي برید راپور هم ورکړل شوی دی.
تمه کېږي، چې نن په غزه کې له ۴۶۷ ورځو جګړې وروسته اوربند ټینک شي.
له بل پلوه د اسراييل لومړي وزير خبرداری ورکړی، چې د يرغمل شويو کسانو نوملړ تر لاسه کولو پورې به د اوربند لړۍ پيل نه کړي او که دويم پړاو ناکام شو؛ جګړه به بيا له سره پيل شي.
له بلې خوا د اسراییل ښي اړخي وزیر بین ګوور چې له حماس سره د اوربند مخالفت کوي، له خپلې دندې استعفا وکړه.
په غزه کې د اوربند په اړه د فلسطیني کډوالو لپاره د ملګرو ملتونو لهخوا په خپره شوې خبرپاڼه کې ویل شوي: «تمه ده، چې اوربند په راتلونکو څو ساعتونو کې عملي شي. د وخت په تېرېدو سره هیلې زیاتېږي، هیله ده چې یرغمل شوي کسان به له خپلو عزیزانو سره یو ځای شي.»
۴۶۷ ورځې کېږي، چې اسراییل په غزه کې د فلسطینیانو پر وړاندې خپله جګړه پیل کړې ده.
پر غزې د اسراییل برید د ۲۰۲۳ کال د اکتوبر په ۷مه د حماس ډلې لهخوا د اسراییل په سویلي سیمو له بریدونو وروسته پیل شو.
په دغو بریدونو کې له ۱۱۰۰ څخه زیات کسان ووژل شول او شاوخوا ۲۴۰ کسان یرغمل شوي دي.
له هغې وروسته اسراییل هم پر غزې بریدونه پیل کړل.
په تېرو ۱۵ میاشتو کې په غزه کې لږ تر لږه ۴۶،۷۰۷ کسان وژل شوي دي، چې شاوخوا ۱۸،۰۰۰ ماشومان هم پکې شامل دي.
په غزه کې د جګړې له امله لږ تر لږه ۱۱۰،۲۶۵ کسان ټپیان شوي دي.
