د اسراییل د کورني امنیت وزیر او د ښي اړخي ګوند «یهودي واک» مشر ایتامار بنګویر ویلي، چې د دغه هېواد په کابینه کې د اوربند د هوکړې د تصویب له امله به د دغه ګوند غړي د یکشنبې په ورځ له حکومت او واکمنې ټلوالې څخه استعفا وکړي.
ټاکل شوې چې د اوربند هوکړه د یکشنبې په سهار عملي شي.
دغه ګوند په یوه بیان کې ویلي دي چې په غزه کې د اوربند هوکړه حماس ته له تسلیمیدو کمه نه ده.
د اسراییل ښي اړخي ګوند ویلي چې د تړون «بې پروا» تصویب به په جګړه کې د اسراییل د پوځ لاسته راوړنې قرباني کړي.
د دغه ګوند په اعلاميه کې راغلي چې په دې تړون کې د سلګونو «قاتلانو» خوشې کول او له غزې څخه د اسرایيل پوځي ځواکونو وتل او په دې سيمه کې د جګړې بندول شامل دي، چې دا «حماس ته له تسليمېدو څخه کم نه دي.»
د اسراییل د کورنيامنیت وزیر په دې وروستیو کې ګواښ کړی و چې که د دغه هېواد د کابینې له خوا هوکړه تصویب شي له حکومته به ووځي.
