په نایجریا کې د تېلو د یو ټانکر د چاودنې له امله ۷۰ تنه وژل شوي دي
د نایجیریا په مرکزي برخه کې د شنبې په ورځ د تېلو یو ټانکر تر چپه کېدو وروسته وچاودېد، چې له امله یې ۷۰ تنه ووژل شول.
د نایجیریا په مرکزي برخه کې د شنبې په ورځ د تېلو یو ټانکر تر چپه کېدو وروسته وچاودېد، چې له امله یې ۷۰ تنه ووژل شول.
د راپورونو له مخې، یاد شمېر کسان د تېلو د اخیستو لپاره راټول شوي وو.
د ځايي پوليسو په وينا، په یوه ټانکر کې چې ۶۰ زره لیټره تېل بار و، د سهار په ۱۰ بجو د ډیکو حنکشن کې د هغه سړک سره ټکر وکړ، چې پلازمېنه ابوجا له شمالي ښار سره نښلوي.
دغه ځایي پولیس زیاتوي، چې د چاودنې له امله شاوخوا ۷۰تنه وژل شوي او ګڼ شمېر نور ټپيان دي.
د ټپيانو دقیق شمېر تر اوسه روښانه نه دی.
د راپورونو له مخې، دغه ډول پېښې ډېری وخت په نایجریا کې رامنځ ته کېږي.
په ۲۰۲۰ کال کې د دغو پېښو لېست یو زرو ۵۳۱ ته رسېدلی و، چې ۵۳۵ څخه ډېر کسان یې وژلي. تېر کال هم د تېلو د یوه ټانکر د چاودنې له امله ۱۴۷ کسان وژل شوي وو.
د اسراییل د عدلیې وزارت د غزې د اوربند د موافقې له مخې د هغو فلسطیني بندیانو نوملړ خپور کړ، چې له مخې به یې خوشې کېږي.
د اسراییل د عدلیې وزارت د ۷۳۵ فلسطینیانو په نوملړ کې د فتح د مهمو مشرانو مروان برغوثي او زکریا الزبیدي نومونه هم شامل دي.
اسراییلي رسنیو ویلي، چې په دغه نوملړ کې هغه بندیان هم شامل دي، چې د عمري بند سزا یې اورېدل شوې وه، خو د اوربند د موافقې له مخې به د ۳۳ اسراییلیانو په بدل کې خوشې شي.
د اوربند په لومړي پړاو کې به ۱۹۰۴ فلسطینیان خوشې شي.
فتح یوه فلسطيني سیاسي او وسله واله ډله ده، چې په ۱۹۵۹ کال کې یې د یاسر عرفات تر مشرۍ لاندې فعالیت پیل کړ او په اوسني وخت کې د فلسطین د خپلواکۍ او ملي حقونو د ترلاسه کولو لپاره مبارزه کوي.
تر دې مخکې اسراییل د هغو ۳۳ اسراییلیانو انځورونه هم خپاره کړي وو، چې د حماس له زندانه خوشې شوي دي.
د قطر لومړي وزیر د چهارشنبې په ورځ وویل، چې په غزه کې د اسراییل او حماس ترمنځ د اوربند موافقه شوې او په غزه کې به اوربند د جنورۍ په ۱۹مه پیل شي.
د شپږ اونیو اوربند به په درې پړاوونو کې عملي کېږي، په لومړي پړاو کې به د بندیانو تبادله او د جګړې د پای ته رسولو په اړه مذاکرات ترسره شي.
په دویم پړاو کې به حماس د اسراییلي ځواکونو بندیان خوشې کوي او اسراییلي پوځ به د غزې له عامه ځایونو څخه ووځي.
په دریم پړاو کې به بیا له غزې څخه د اسراییلي ځواکونو بشپړ وتل او د غزې د بیارغونې چارې ترسره شي.
د هند د بهرنیو چارو وزیر ایس جی شنکر د شنبې په ورځ وویل چې پاکستان د هند په ګاونډ کې "یوه استثنا" ده او ټینګار یې وکړ چې له ترهګرۍ د اسلام اباد دوامدار ملاتړ «هغه سرطان دی چې اوس یې د سیاسي بدن غوښه خوري».
شنکر د ممبۍ په ناني پالکيوالا کې د وینا پرمهال وویل، چې د پاکستان کړنې نه یوازې ګاونډیانو ته زیان رسوي، بلکې ټولې نیمې وچې ته بې ثباتي راولي.
د انډیا ټوډې د رپوټ له مخې، هغه زیاته کړه: « پاکستان له پولو پورې ترهګرۍ ته په پام زموږ په ګاونډ کې یوه استثنا ده. دا سرطان اوس د خپل بدن غوښه خوري. دا د ټولې نیمې وچې په ګټه ده چې پاکستان له دغه چلنده لاس واخلي».
میانمار او افغانستان ته په اشارې سره شنکر له دواړو هېوادونو سره د هند اوږدمهاله ولسي اړیکې روښانه کړې.
هغه د دواړو هېوادونو د حالاتو پیچلتیا ومنله او ټینګار یې وکړ چې سیمهییزثبات ډېر مهم دی.
شنکر وویل: « موږ باید په دې پوه شو چې هغه هېوادونه چې نږدې دي، د هغو ګټې له لرې پرتو هېوادونو بېخي توپیر لري».
هغه د سوله ییزې او همکارې سویلي اسیا پر ازرښت په ټینګار سره وویل، « د هند ننګونه دا ده چې له وېش وروسته ګاونډ بیا جوړ کړي. هند اوس دا د یوه سخي او غیر متقابل چلند له لارې کوي، د انرژۍ، ریل او سړک د اتصالاتو تمویل او ملاتړ کوي، تجارت او پانګونه پراخوي او تبادلات او اړیکې پراخوي».
د هند د بهرنیو چارو وزیر وايي، د ناورینونو په وخت کې که هغه وبا وه یا اقتصادي سقوط، نوی ډیلي د خپلو «کوچنیو ګاونډیانو» لپاره د بیمې په توګه عمل کړی.
هغه زیاتوي، « سریلانکا دا په ۲۰۲۳ کې وموندل، کله چې نړۍ پاتې راغلې وه او هند له څلور میلیارده ډالرو زیاتې مرستې ترتیب کړې».
هغه زیاته کړه: « دا هم یو حقیقت دی چې سیاسي پرمختګونه ممکن پیچلي حالتونه رامنځته کړي لکه څنګه یې چې موږ اوس مهال په بنګله دېش کې ګورو. د نږدې همکارۍ او اړیکو هدف دا دی چې د ورځې په پای کې دا ډول احتمالي حالتونه حل کړي. دا د ګټو متقابل عمل دی چې باید غالب شي».
ټیک ټاک وایي چې که د بایډن له لوري ډاډ ترلاسه نه شي، د یکشنبې په ورځ به په متحده ایالاتو کې بند شي. ټیک ټاک تېر ماښام خبرداری ورکړ چې که د ولسمشر جو بایډن ادارې له خوا د اپل او ګوګل په څېر ډاډ ورنه کړل شي، نو دغه ټولنیزه شبکه به د یکشنبې په ورځ په متحده ایالاتو کې بنده شي.
د امریکا سترې محکمې د جمعې په ورځ په دغه هېواد کې د ټیک ټاک د بندولو یوه لایحه تایید کړه چې که چینایی شرکت بایټ ډانس یې ونه پلوري نو وبه تړل شي.
د محکمې پریکړې دغه ټولنیزه شبکه او د دې ۱۷۰ میلیونه امریکايي کاروونکي په یوه سردرګمه حالت کې اچولي.
اوس د ټیک ټاک راتلونکې په ډونالډ ټرمپ پورې تړلې ده، چې د دوشنبې په ورځ د ولسمشرۍ پر څوکۍ کښیني، خو له چین سره د هغه رقابتي ماضي ته په پام داسې نه ښکاري چې نوموړی دې ټیک ټاک په غیر مشروط ډول کار ته پریږدي.
ټیک ټاک شرکت وویل، چې «که د بایډن اداره سمدستي پرېکړه ونه کړي، نو له بده مرغه ټیک ټاک به اړ شي چې د جنوري پر ۱۹مه نېټه بند شي».
اپل، ګوګل، اوریکل او نور ممکن له ټیک ټاک سره د ګډو خدماتو له امله له بندیز وروسته له لویو جریمو سره مخ شي.
دغه لایحه تیر کال د کانګرس دواړو ګوندونو ومنله او بایډن لاسلیک کړه.
ټیکټاک، بایټ ډانس او د دې اپلیکیشن ځینو کاروونکو دغه لایحه ننګولې، خو د امریکا سترې محکمې پریکړه وکړه چې دغه لایحه د امریکا د اساسي قانون له لومړي ترمیم سره مخالفه نه ده.
بایټ ډانس تر اوسه ټیک ټاک نه دی پلورلی، خو د یکشنبې مهلت ته نږدې شوی.
ټرمپ، چې په ۲۰۲۰ کال کې یې د ټیک ټاک د بندولو هڅه کړې وه، ویلي چې د دغه اپلیکیشن د ژغورلو لپاره به اقدامات وکړي.
د ټیک ټاک اجرایه رییس شاو زي چیو پلان لري چې د دوشنبې په ورځ په واشنګټن کې د ټرمپ د لوړې په مراسمو کې ګډون وکړي.
ټرمپ وویل چې هغه او د چین ولسمشر شي جینپینګ د ټیکټاک په اړه د جمعې په ورځ په یوه ټیلیفوني اړیکه کې خبرې کړې دي.
له کلونو راهیسې ټیک ټاک چینايي شبکې د امریکایي مشرانو اندیښنې راپارولي او د ټیک ټاک جنګ په داسې وخت کې روان دی چې د نړۍ دوه ستر اقتصادي ځواکونه د سوداګرۍ په برخه کې له زیات ټکر سره مخ دي.
د کانګرس غړو او د بایډن ادارې ویلي چې چین کولای شي د ټیک ټاک په مرسته د میلیونونو امریکایانو په اړه ډېټا راټوله کړي.
له دې وړاندې پر ټیک ټاک په افغانستان، البانیا، استونیا، بریټانیا، اروپايي ټولنې، فرانسې، هالنډ، ناروې، ډنمارک، کاناډا، نیوزیلنډ، هند، تایوان او پاکستان کې وخت ناوخته بشپړ یا نیمه بندیزونه لګېدلي دي.
د پاکستان پوځ د عامه اړیکو دفتر وايي، چې تېره ورځ جمعه د (مرغومي ۲۸مه) یې د خیبرپښتونخوا په تیرا کې د پوځي عملیاتو پر مهال پنځه وسله وال وژلي دي. ټي ټي پي لا تر اوسه پورې په دې اړه څه نه دي ویلي.
د پاکستان پوځ د عامه اړیکو دفتر تېره ورځ جمعه د یوې خبرپاڼې په خپرولو سره ویلي، چې پوځ د خیبرپښتونخوا په تیرا سیمه کې د پوځي عملیاتو پر مهال پنځه وسله وال وژلي او یو یې ژوندی نیولی.
خبرپاڼه کې راغلي، چې د پاکستان پوځ او ایف سي ځواکونو په ګډو عملیاتو کې یې د تیرا هغه وسله وال وژلي چې په سیمه کې د پاکستاني امنیتي ځواکونو په وړاندې جنګېدل.
تر اوسه پورې لا تحریک طالبان پاکستان په دې اړه څه نه دي ویلي.
خبرپاڼه زیاتوي چې، له دغو وسله والو څخه وسلې او مهمات هم لاسته ورغلي، چې د «امنیتي ځواکونو په وړاندې په ترهګریزو فعالیتونو او همدارنګه د بې ګناه ملکي وګړو په هدفي وژنو کې ترې کار اخیستل کیده.»
د پاکستان پوځ د عامه اړیکو دفتر وايي، چې په سیمه کې د وسله والو پر ضد لا هم عملیات روان دي او هڅه یې دا ده چې دغه سیمه له وسله والو څخه پاکه کړي.
د یو بل خبر له مخې د خیبرپښتونخوا ایالت په کورمه ولسوالۍ د شعیه او سني د روانې مذهبي کشالې د ختمولو او هلته د وسله والو د فعالیتونو د له منځه وړولو په موخه ځايي چارواکو او پوځ په ګډه پرېکړه کړې چې په کورمه کې به پوځي عملیات پیلوي.
ویل کیږي، چې دغه عملیات به د کورمې په بیلابیلو سیمو کې پیل شي او هغه ځايي خلک چې د تاوتریخوالي له امله بیځایه شوي له هغو سره به هم مرستې وشي.
د پاکستان پوځ وايي، تېره یوه میاشت کې یې یوازې د خیبرپښتونخوا په تیرا کې ۲۲ وسله وال وژلي او ۱۸ نور یې ټپیان کړي دي.
د پاکستان پوځ وايي، د روان ۲۰۲۴ کال د ډیسمبر له ۱۴مې نیټې راهیسې د ترسره شويو بیلابیلو استخباراتي عملیاتو پر مهال پاکستاني ځواکونو تر اوسه پورې په بریالیتوب سره ۲۲ وسله وال وژلي او ۱۸ نور یې ټپیان کړي دي.
د اندونیزیا د خوړول پروګرام څارونکي ادارې مشر وویل اندونیزیا د ۶.۱۱ میلیارد ډالرو اضافي بودیجې ته اړتیا لري ترڅو د وړیا تغذیې پروګرام پراخ کړي چې د کال تر پایه د دې هیواد څلورمې برخې نفوس ته ورسیږي.
د دغه ادارې مشر دادان هینداانا وویل، چې ولسمشر پرابوو سوبیانتو د ۲۰۲۵ تر پایه پورې د اندونیزیا د ۲۸۰ میلیون نفوس نږدې ۸۳ میلیون ته د رسیدو په لارو چارو غور کوي.
په اندونیزیا کې مالي بازارونو د وړیا خواړو برنامې لګښت په اړه اندیښنې راپورته کړې دي.
د وړیا تغذیې دغه پروګرام د دې میاشتې په پیل کې د ښوونځي ماشومانو او امیندواره مېرمنو لپاره پیل شو.
دادان له پرابوو سره تر کتنې وروسته خبریالانو ته وویل: "ولسمشر نارامه دی، ځکه چې ډېرو ماشومانو ته پر وخت خواړه نه دي رسېدلي. هغه فکر کوي چې دغه بهیر ګړندی کړي، تر څو د ۲۰۲۵ کال تر پایه ۸۲.۹ میلیونه کسان ترې ګټه واخلي."
نوموړي وویل، دا څرګنده نه وه چې ایا پرابوو اضافي بودیجه تصویب کړې که نه، خو که چیرې د هغه اداره په سپتمبر کې ۶.۱۱ میلیارده ډالر ترلاسه کړي، نو دا ډول پراختیا ممکنه ده.