د طالبانو د رییس الوزرا اداري مرستيال د یوه سوداګريز کمپلکس د پرانيستې پر مهال وویل، چې هيڅ هېواد ته د افغانستان په کورنيو چارو کې د لاسوهنې اجازه نه ورکوي. عبدالسلام حنفي د دغه سوداګريز کمپلکس جوړېدل د خپلې واکمنۍ تر ټولو ستره ملي پروژه ياده کړې.
د طالبانو د رییس الوزرا اداري مرستیال عبدالسلام حنفي د سې شنبې په ورځ د یوه سوداګريز کمپلکس د پرانيستي پر مهال وویل: « دا لومړنۍ ستر ملي پروژه ده، چې د اسلامي امارت د بیا واکمنۍ پر مهال پيل او په ټاکلي وخت پای ته رسېدلې.»
نوموړي ويلي، چې دغه سوداګريز کمپلکس د ۳۴ ميليونه ډالرو په ارزښټ په ۹ پوړه کې جوړ شوی.
حنفي هيله ښودلې، چې په دې سره به په افغانستان کې د پانګونې برخه زياته شي.
هغه په دې اړه جوړې شوې غونډې ته وویل، چې د دوی سیاست اقتصاد محوره او له نړۍ سره په ښو اړیکو متمرکز دی، «اسلامي امارت د هېڅ هېواد په کورنيو چارو کې لاسوهنه نه کوي او چا ته به د افغانستان په کورنيو چارو کې د لاسوهنې اجازه هم ورنه کړي.»
نوموړي د افغانستان په چارو کې د لاسوهنې په اړه د کوم هېواد نوم وا نخیست خو تر دې وړاندي طالب چارواکو په دا ډول غير مستقیمو څرګندونو کې پاکستان ته اشاره کړې.
د طالبانو د کار او ټولنیزو چارو وزير عبدالمنان عمري هم د دې پروژې پلي کېدل د افغانستان د ثبات په مانا یاد کړي او هيله يې ښودلې، چې په دې سره به زياتو کسانو ته د کار زمينه برابره شي.
