د جرمني لومړی وزیر: مجرم ته دې سزا ورکړل شي او باید له هېواده ووځي
د جرمني لومړي وزیر اولاف شولڅ په مونشن کې د یوه افغان له لوري په موټر د ۲۸ کسانو د وهلو په غبرګون ویلي؛ هغه ته باید سزا ورکړل شي او باید له هیواده و اېستل شي.
د جرمني لومړي وزیر اولاف شولڅ په مونشن کې د یوه افغان له لوري په موټر د ۲۸ کسانو د وهلو په غبرګون ویلي؛ هغه ته باید سزا ورکړل شي او باید له هیواده و اېستل شي.
د پنج شنبې په سهار یوه ۲۴ کلن افغان کډوال د جرمني په مونیخ ښار کې د خلکو پر ګڼه ګوڼه موټر وربرابر کړ او ۲۸ کسان یې ټپي کړل.
یادې پیښي ته د جرمني لومړي وزیر اولاف شولڅ سخت غبرګون ښودلی او وايي، چې مجرم د نرمۍ تمه نه شي کولی.
نوموړي ویلي:«هغه ته باید سزا ورکړل شي او هغه باید له هیواده ووځي.»
همددارنګه د جرمني لومړی وزیر وايي:« که دا پېښه یو برید وي، د احتمالي عاملینو په وړاندې د عدالت پلي کولو لپاره باید ټولې لارې چارې په کار واچول شي.»
د رسنیو د راپورونو له مخې، دا شکمن برید څو ساعته مخکې له هغه وشو، چې ټاکلې وه د امریکا د لسمشر مرستیال جي ډي وینس او د اوکران د ولسمشر ولادیمیر زیلینسکي په ګډون د ځینو نورو هېوادونو استازي د مونشن امنیتيي کنفرانس لپاره د جرمني دغه سویلي ښار ته ورشي.
بل خوا په جرمني کې د فبروي د ۲۳ مې نیتې د ټاکنو د کمپاین لپاره د کډوالو او امنیتي مسایلو باندې خورا ډیر تمرکز کیږي.
د جرمني د لومړي وزیر مخالف سیاستوال په خپلو کمپاینونو کې نوموړی له کډوالو سره په نرم چلند تورنوي.
په مونشن کې د ننۍ پیښي په غبرګون د محافظه کار ګوند یو مشر میرز چې د جرمني د راتلونکي لومړي وزیر څوکۍ ته مخکښ نوماند دی په اېکسپاڼې لیکلي:« موږ به قانون او نظم پلي کړو. هر څوک به بیا زموږ په هېواد کې خوندي احساس وکړي. په جرمني کې باید یو څه بدلون راشي.»
پولیسو د یادې پیښي وروسته په سیمه کې د شاهدانو د راټولیدو لپاره یو ځای جوړ کړی او هلته د یادې پیښي په اړه شاهدان خپل د سترګو لیدلی حال له پولیسو سره شریکوي.
بل خوا د مونیخ ځايي مسولینو ویلي، چې داسې نه انګیرل کیږي، چې دا پېښه دې د مونیخ د امنیتي کنفرانس سره کوم تړاو ولري.
