د طالبانو د کليو او پراختيا سرپرست وزیر محمدیونس اخوندزاده وايي، چې د ددوی د حکومت په منځ کې اختلافات نشته او په دې اړه دې ولس «تشویش» نه کوي. نوموړي زیاته کړه، چې د طالب مشرتابه په شتون کې به د دښمن د اختلافاتو خوب رښتيا نه شي.
د طالبانو د کليو او پراختيا سرپرست وزیر محمديونس اخوندزاده د کندهار میوند ولسوالۍ کې د ۱۷ کلیومتره سړک د جوړېدو د پرانيستې په مراسمو کې وویل: «د کوم هدف لپاره چې قرباني ورکول شوې، نظام هم د هغه لپاره روان دی.»
نوموړي زياته کړې، چې په اوسني نظام کې مسوولین او عام خلک ګډ مسوولیتونه لري.
د طالبانو د کلیو او پراختیا وزارت هم په یوه خبرپاڼه کې ویلي، چې د کندهار په میوند لسوالۍ کې دغه سړک د ۳۰ میلیونه افغانیو په لګښت جوړيږي.
دغه طالب چارواکی وايي، چې د ولسونو د ستونزو د حل په موخه یې زياتې پروژې تر لاس لاندې دي او په ترڅ کې به یې د سيمې ډېر کسان په دندو وګومارل شي.
په دې وروستيو کې د طالبانو د خپل منځي اختلافاتو ډېر خبرونه ورکول کيږي او یو شمېر کسان د هبت الله له لوري په لوړو بستونو کې تغیرات راوستل د همدې اختلافاتو بیلګي یادوي.
دا اختلافات وروسته تر هغه په رسنيو کې زيات خپاره شول، چې د طالبانو د بهرنیو چارو سیاسي مرستيال شیرمحمد عباس ستانکزي کابل پريښود او متحده عربياماراتو ته ولاړ.
د طالبانو د بهرنیو چارو سرپرست وزیر امیرخان متقي پرون په یوه دیني مدرسه کې د وینا پرمهال په نامستقیم ډول د دغې ډلې د مشر له خوا د واک پر تمرکز نیوکه کړې او داخلي یووالی یې مهم بللی.
