د اسیا ایمرجېنګ جام اتلان، افغان ابدالیان (د افغانستان الف کرېکټ لوبډله) د روان کال په اپرېل میاشت کې د سریلانکا او ایرلنډ الف لوبډلو پر وړاندې په درې اړخیزه لوبلړۍ کې ګډون کوي.
د افغانستان کرېکټ بورډ د معلوماتو له مخې، دغه سیالۍ به د اپرېل میاشتې په ۷مه نېټه د افغانستان په کوربهتوب په متحده عربي اماراتو کې پیل شي او د مې تر ۲مې نېټې به دوام وکړي. د دې لړۍ په ترڅ کې به اووه یو ورځنۍ او دوه څلور ورځنۍ سیالۍ ترسره شي.
یاده دې وي، چې د افغان ابدالیانو لوبډلې د اسیا ایمرجېنګ جام کرېکټ سیالیو په پایلوبه کې د سریلانکا الف لوبډلې ته په ماتې ورکولو د ۲۰۲۴ کال اتلولي خپله کړې وه.
دا لومړی ځل و، چې د افغان ابدالیانو کرېکټ لوبډله د اسیا په کچه د دومره سترو سیالیو اتلولي ګټي.
د اتلانو نړۍوال جام سیالیو په لړ کې افغان کرېکټ ملي لوبډلې په خپله دویمه سیالي کې خپلې سیالې برېټانیا ته ماته ورکړه.
دا لوبه د چهارشنبې په ورځ (د کب ۸مه) د پاکستان په کوربهتوب د دغه هېواد د لاهور ښار په قذافي نړۍوال کرېکټ لوبغالي کې ترسره شوه.
افغان ملي اتلانو د لوبې ټاس وګاټه او د سیالې انګلېنډۍ ملي لوبډلې پر وړاندې یې د توپوهنې پرېکړه وکړه چې د ابراهیم ځدراڼ د ښې ځلېدنې پر مټ یې سیالې لوبډلې ته د ۳۲۶ منډو هدف وټاکه.
په دې لوبه کې ابراهیم ځدراڼ تر ټولو ډېرې ۱۷۷، عظمتالله عمرزي ۴۱، محمدنبي چټکې ۴۰ او لوبډلمشر حشمتالله شهیدي ۴۰ منډې وکړې، چې سیالې انګلېنډۍ لوبډلې ته یې یاد هدف وټاکه.
د انګلېنډ لپاره په توپاچونه کې جوفرا ارچر ۳، لیم لیوېنسټون ۲، عادل رشید او جیمي اورټون ۱-۱ وېکټه ترلاسه کړه.
همداراز د افغان کرېکټ ملي لوبډلې توپاچوونکو وکولای شول، چې له خپل ټاکل شوي هدف څخه کلکه دفاع وکړي.
د لوبې په دویمه پاڼۍ او د افغان اتلانو د توپاچونې په برخه کې عظمتالله عمرزي ترټولو ډېرې ۵، محمدنبي ۲، راشدخان، ګلبدین نایب او فضلالحق فاروقۍ ۱ - ۱ وېکټې ترلاسه کړې.
هېره دې نه وي، چې پیلیز توپوهونکی ابراهیم ځدراڼ د خپلو ۱۷۷ منډو پر مټ د انګلستان پر وړاندې د نننۍ لوبې غوره لوبغاړی ونومول شو.
د یادونې ده، چې د افغانستان کرېکټ ملي اتلان به د چمپینز ټرافي یا اتلانو جام په خپله درېیمه سیالي کې د راتلونکې جمعې په ورځ د اسټرالیا پر وړاندې د لوبې ډګر ته ښکته شي.
د اتلانو جام سیالیو په دوام د افغان کرېکټ ملي لوبډلې توپ وهوونکي ابراهیم ځدراڼ نن د انګلینډ پر وړاندې ۱۷۷ منډې جوړې کړې او ګڼ ریکارډونه یې مات کړل، چې پکې د هند د پخواني کپتان کپل دیو ریکارډ هم شامل دی.
۲۳ کلن افغان توپ وهونکي ابراهیم ځدراڼ په ۱۴۶ توپونو ۱۷۷ منډې جوړې کړې، چې پکې ۶ شپږیزې او ۱۲ څلوریزې شاملې وې.
ابراهیم ځدراڼ په دې لوبه کې یو شمېر ریکارډونه جوړ کړل.
هغه د ای سي سي په چیمپینز ټرافي سیالیو کې د سلیزې وهلو لومړی افغان لوبغاړی شو. همداراز، هغه د افغانستان لپاره د نړۍوال جام په تاریخ کې هم د سلیزې وهلو لومړی لوبغاړی دی.
ابراهیم ځدراڼ د یو ورځنیو لوبو په تاریخ کې د افغانستان لپاره تر ټولو ستره انفرادي پاڼۍ ترسره کړې، چې ۱۷۷ منډې وې. نوموړي خپل پخوانی د ۱۶۲ منډو ریکارډ مات کړ.
ابراهیم ځدراڼ د ۱۷۷ منډو سره د چیمپینز ټرافي په یوه پاڼۍ کې د تر ټولو زیاتو منډو جوړولو ویاړ هم خپل کړ، تر دې وړاندې دا ریکارډ د انګلینډ توپ وهونکي بین ډکټ سره و، چا چې د همدې سیالیو په یوه لوبه کې د اسټرالیا پر وړاندې ۱۶۶ منډې جوړې کړې وې.
ابراهیم ځدراڼ د ای سي سي په یو ورځنیو سیالیو کې د ډېرو منډو په جوړولو سره د اسیايي لوبغاړو په لېست کې د هندي لوبغاړي کپل دیو څخه مخکې شو او دویم مقام ته ورسېد.
کپل دیو د ۱۹۸۳ نړۍوال جام کې ۱۷۵ منډې جوړې کړې وې.
په دې لېست کې لومړی مقام د هندي ستوري ساروو ګنګولي سره دی، چا چې په ۱۹۹۹ نړۍوال جام کې د سریلانکا پر وړاندې ۱۸۳ منډې جوړې کړې وې.
سربېره پر دې، ابراهیم ځدراڼ د یو ورځنیو سیالیو په لږو لوبو کولو سره د شپږو سلیزو جوړولو ویاړ هم ترلاسه کړ.
ابراهیم ځدراڼ دا ویاړ یوازې په ۳۵ لوبو په کولو سره او نوم یې د کوینټن ډي کاک، ډیرل میچل او شبمن ګیل سره یو ځای شو.
د اتلانو جام سیالیو پر دوام، افغان لوبډلې د ننۍ لوبې پچه وګټله او د انګلنډ لوبډلې پر وړاندې یې د توپ وهنې پرېکړه وکړه. دغه لوبه نن د پاکستان په کوربهتوب د لاهور په قذافي لوبغالي کې ترسره کېږي.
د افغان لوبډلې د ننۍ لوبې په نوملړ کې د رحمان الله ګربز، ابراهیم ځدراڼ، صدیق الله اتل، رحمت شاه، حشمت الله شهیدي، عظمت الله عمرزي، محمد نبي، ګلبدین نایب، راشدخان، نوراحمد لکڼوال او فضل الحق فاروقي نومونه شامل دي.
دغه لوبه د دواړو لوبډلو لپاره یوه برخلیکټاکونکې سیالي بلل کېږي.
افغان کرېکټ ملي لوبډلې د چمپینز ټرافي یا اتلانو جام په سیالیو کې خپله لومړنۍ لوبه د سوېلې افریقا پر وړاندې بایللې؛ خو انګلستان ته په ماتې ورکولو سره کولای شي د مخته تګ چانس ډېر کړي.
په بي ګروپ کې تر دمه سوېلي افریقا او اسټرالیا لوبډلې د درې، درې امتیازونو په لرلو سره ترټولو مخکښې دي.
د افغانستان د ښځینهو کرېکټ ملي لوبډلې غړې فېروزې امیري له سکای نیوز سره په مرکه کې ویلي، چې په اتلانو جام کې د افغانستان او برېتانیا ترمنځ د لوبې پرېکون «د افغانستان د ښځو پر وضعیت کوم اغېز» نه کوي.
هغه د کرېکټ نړۍوالې شورا لهخوا د ښځینه لوبډلې په رسمیت پېژندو غوښتونکې شوه.
د برېتانیا د کرېکټ ملي لوبډله د اتلانو جام په یوې حساسه لوبه کې د چهارشنبې په ورځ د افغانستان پر وړاندې د لوبو ډګر ته ښکته کېږي.
د افغانستان د ښځو کرېکټ ملي لوبډله چې په ۲۰۲۱کال کې د طالبانو تر واکمنېدو وروسته اسټرالیا ته کډواله شوه وویل، چې په دغو درېیو کلونو کې د کرېکټ د نړۍوالې شورا لهخوا بابېزه ګڼل شوې او د دوی څخه د ملاتړ غوښتنې بې ځوابه پاتې دي.
که څه هم د کرېکټ نړۍوالې شورا د قانون له مخې، هغه هېوادونه چې د ښځو کرېکټ ملي لوبډله نه لري، نه شي کولای چې د نارینهو نړۍوالو لوبو کې ګډون وکړي؛ خو د افغانستان د نارینهو کرېکټ ملي لوبډله لاهم په نړۍوالو لوبو کې د لوبېدو اجازه لري او د هغوی لپاره کوم محدودیت په پام کې نه دی نیول شوی.
له دې سره د افغانستان د ښځینهو کرېکټ ملي لوبډلې غړې فېروزه امیري ټینکار کوي، چې د برېتانیا لهخوا د لوبې سره پرېکون یوه مناسبه حل لار نه ده.
هغې د سکای نیوز ورزشي برخې ته وویل: «دا چې نړۍ غواړي له موږ او افغان ښځو ملاتړ وکړي، یوه ښه هڅه ده؛ خو زه خپله داسې فکر کوم، چې پرېکون به اغېز ونه کړي.»
فېروزې د افغانستان د ښځو کرېکټ ملي لوبډلې د راتلونکې په اړه وویل: «د هغې وخت رارسېدلی، چې د کرېکټ نړۍواله شورا یو ګام واخلي او موږ د ملي لوبډلې په توګه په رسمیت وپېژني او اجازه راکړي، چې په نړۍواله کچه سیالي وکړو. او یا موږ دې د کډوالې لوبډلې په توګه په رسمیت وپېژني؛ تر څو د افغانستان استازيتوب وکړای شو.»
د افغانستان د مخکیني حکومت تر پرځېدو وړاندې د هېواد کرېکټ بورډ ژمنه کړې وه، چې د ښځو د کرېکټ د ودې په برخه کې پروګرامونه پیلوي او ۲۵ لوبغاړې یې ملي لوبډلې لپاره ټاکلې وې؛ خو دغه اقدام د ۲۰۲۱کال په نیمایي کې په ټپه ودرېده.
د افغانستان د نارینهو کرېکټ ملي لوبډلې روزونکی جاناتان تروت وایي، لوبغاړي یې پوهېږي چې «په هېواد کې یې وضعیت سم نه دی» او د ښځو پر وړاندې د طالبانو له سختو بندیزونو خبر دي.
هغه په اتلانو جام کې له برېتانیا سره د یوې حساسې لوبې له پیل وړاندې په لاهور کې بيبيسي ته وویل: «زموږ لوبغاړي د سم او ناسم ترمنځ په توپیر پوهېږي. د هغوی لپاره یو پېچلی وضعیت دی. زه هڅه کوم، چې د هغوی دغه وضعیت درک کړم.»
د لوبې تر مخه په یوې خبري غونډه کې د افغانستان د کرېکټ ملي لوبډلې لوبډلمشر حشمتالله شهیدي وویل: «ټول غواړي، چې د افغانستان د کرېکټ ښځینه لوبغاړي هم وشي کړای، کرېکټ وکړي.»
خو هغه د برېتانیا لهخوا د افغانستان سره د لوبې د پرېکون په اړه وویل: «موږ لوبغاړي یو او یوازې هغه څه چې په لوبغالي کې کېږي پرې کار کولای شو، سیاست زموږ په واک کې نه دی.»
تر ۱۶۰ ډېرو بریتانیايي سیاستوالو د یوه لیک په لاسلیکولو سره د برېتانیا له کرېکټ ملي لوبډلې وغوښتل، چې د طالبانو سره د اعتراض لپاره دې د افغانستان کرېکټ ملي لوبډلې سره له لوبې ډډه وکړي.
ورته مهال د برېتانیا لومړی وزیر کېیر سټارمر د کرېکټ نړۍوالې شورا د قوانینو د پلي کولو غوښتنه وکړه؛ خو د برېتانیا د کلتور وزیرې لیزا نندي ټینګار وکړ، چې لوبه باید ترسره شي؛ تر څو د برېتانیا لوبډله تاوان ونه کړي او وړاندیز یې وکړ، چې برېتانوي چارواکي دې په دغو سیالیو کې ګډون ونه کړي.
له دې سره د برېتانیا کرېکټ بورډ منلې، چې د دغه هېواد لوبډله به په لوبو کې ګډون وکړي.
د دغې لوبډلې اجراییوي مشر ریچارډ ګولډ سکای نیوز ته وویل:« د لوبې سره پرېکون به یو بې پایلې اقدام وي. طالبان پرې سر نه خوږوي. تر نیمایي ډېر طالبان اصلأ نه غواړي، چې په افغانستان کې د کرېکټ لوبه وشي؛ نو له دې امله دغه ډول اقدام به د افغانستان د خلکو په ګټه نه وي.»
هسپانوي خبریال الکس کنډل له انټر میامي سره د لیونل مسي د یوځای کېدو خبر ورکړ. لیونل مسي ویلي: «نه شم کولی چې نیوکمپ ته له راستنېدو پرته خپل فوټبال پای ته ورسوم.»
د دغه خبریال په خبره، داسې انګېرل کېږي چې بارسلونا هم د مسي بیرته راستنیدو سره علاقه لري.
د مسي بېرته راتګ بارسلونا ته د دې کلب د مینهوالو لپاره تر ټولو ستر خبر کېدای شي.
که څه هم د مسي او د بارسلونا د کلب د مشر ترمنځ اړیکې چندان ښې نه دي، خو داسې ښکاري چې د کلب مشر خوان لاپورتا هم د مسي د بېرته راوستلو لېوالتیا لري او د دې همکارۍ د بیا پیل لپاره شرایط ارزوي.
د مسي قرارداد له انټرمیامي سره د ۲۰۲۵ کال په پای کې ختمېږي او تر هغه وخته به نوی نیوکمپ هم د کارونې لپاره چمتو وي.
مسي غواړي، چې یو ځل بیا د بارسلونا په کالیو کې د نیوکمپ په لوبغالي کې ولوبېږي.
البته اقتصادي شرایط هم پهدې قضیه کې مهم رول لري او لا هم په بشپړ ډول نه شي ویل کېدای، چې مسي به سل په سلو کې بېرته بارسلونا ته راشي او که نه.
د للکس کنډال راپور دا ځل جدي ښکاري؛ که څه هم کله چې نوموړي د مسي د انټرمیامي ته د تګ خبر ورکړ، ډېرو خلکو باور نه کاوه، خو دا ځل وضعیت فرق لري.