د طالبانو ویاند ذبیح الله مجاهد په یوه غږیز پیغام کې ویلي، چې یوناما د افغانستان په اړه منفي تبلیغات کوي او هغه ډول فعالیت یې نه دی ترسره کړی؛ لکه څنګه چې ترې تمه کېږي. یوناما په ۲۰۲۴ کې د طالبانو په زندانونو کې د بندیانو د شکنجې له موضوع پرده پورته کړې وه.
دغه څرګندونې داسې مهال کېږي، چې ټاکل شوې د افغانستان لپاره د ملګرو ملتونو د سرمنشي ځانګړې استازې روزا اوتنبایوا د را روانې دوشنبې په ورځ (د کب ۲۰مه) د امنیت شورا په ناسته کې د افغانستان په اړه وینا وکړي.
ښاغلي مجاهد ویلي، یوناما تل هڅه کړې چې ډېرې وړې مسلې لویې ښکاره کړي او په افغانستان کې د ناامیو په اړه اندېښنې وزېږوي.
هغه زیاته کړې، یوناما په خپلو راپورونو کې حقایق نه دي وړاندې کړي او د یوناما ماموریت په هغه ډول چې لازمه وه؛ ګټور نه و.
د مجاهد په وینا، یوناما په خپلو راپورونو کې د طالبانو د لاسته راوړنو، پرمختګ او امنیت په اړه کله هم څه نه دي ویلي.
ملګرو ملتونو تر اوسه پورې د امنیت شورا په غونډه کې د یوناما د مشرې د وینا په اړه جزییات نه دي ورکړي؛ خو د دغې شورا په تېره غونډه کې له افغانستانه د داعش د ګواښ په اړه خبرداری ورکړل شوی و.
