د زدهکړو فعال وزیرخان د طالبانو له بنده خوشې شو
افغانستان انټرنشنل پښتو ته د زدهکړو فعال وزیرخان یو خپلوان منلې، چې نوموړی د سې شنبې په ورځ (د کب په ۲۱مه نېټه) د طالبانو له بنده خوشې شوی دی.
افغانستان انټرنشنل پښتو ته د زدهکړو فعال وزیرخان یو خپلوان منلې، چې نوموړی د سې شنبې په ورځ (د کب په ۲۱مه نېټه) د طالبانو له بنده خوشې شوی دی.
وزیرخان (د روانې کب میاشتې په ۶مه نېټه) د طالبانو استخباراتو ډلې له خپل کوره وړی و.
طالبانو لاتراوسه د وزیرخان د نیولو او خوشې کولو په تړاو څه نه دي ویلي.
وزیرخان د کابل په بتخاک سیمه کې د قومي مشرانو په مشوره د ماشومانو لپاره وړیا د زدهکړو ټولګی جوړ کړی و.
که څه هم د وزیرخان کورنۍ له رسنیو سره په دې تړاو له خبرو کولو ډډه کوي؛ خو د هغه خپلوان وایي، چې نوموړی د زدهکړو په برخه کې د فعالیت له امله نیول شوی و.
د هغه دغه خپلوانو زیاته کړې ده، چې وزیرخان او د هغه کورنۍ د رسنیو سره له خبرو کولو منع شوي دي.
د وزیرخان خپلوان تر دې وړاندې هم افغانستان انټرنشنل ته ویلي و، چې نوموړی له نیولو یوه میاشت وړاندې د بغلان استخباراتو هم غوښتی و.
د وزیر خان کورنۍ وايي، چې د ټیلیفوني اړیکې پرمهال د طالبانو استخباراتو ته هغه ویلي و چې دی حاضر دی په کابل کې د طالبانو استخباراتو ریاست ته ورشي؛ خو هغوی له کوره لاس تړلی نامعلوم ځای ته انتقال کړ.
د وزیرخان د بند په موده کې د هغه کورنۍ د نوموړي له حال او ځای څخه بې خبره وه.
د ماشومانو د زدهکړو فعال وزیر خان ورور امیرخان ځلاند تر دې وړاندې انډیپنډنټ ورځپاڼې ته ويلي و:« موږ هیڅ نه پوهېږو، چې هغه اوس چېرته او حالت یې څنګه دی.»
تردې وړاندې هم طالبانو د زدهکړو ځیني فعالان نیولي او بندیان کړي وو.
طالبانو څه موده وړاندې د زړهکړو فعال مطیع الله ویسا او فهیم عظیمي هم نیولي و.
