د مفتي شاکر زوی عبدالله شاکر وایي، تر هغه وخته د خپل پلار جنازه نه کوي چې لومړی وزیر، د صوبې وزیر اعلی او د پولیسو قوماندان یې د پلار د مرګ په اړه ځواب نه وي ورکړی. هغه وایي، پولیسو ته یې د مفتي شاکر د ژوند د ګواښ په اړه ویلي و، خو پولیسو ورته هېڅ امنیتي تدابیر ونه نیول.
عبدالله شاکر د پاکستان لومړی وزیر د خپل پلار د مرګ لامل وباله او ویې ویل: «لومړی وزیر تا ته وایم، وزیر اعلی تاته وایم او د پوځ مشره تاته وایم، دا خبره په ګپ کې تېره نه کړې زما پلار تاسو شهید کړی، که تاسو ورته لیسنس ورکړی وای، تاسو ورته سیکیوریټي ورکړی وای نن به دا حال نه و.»
عبدالله شاکر وایي: «تر هغه پورې د خپل د پلار د کفن او دفن هېڅ فکر نه لري تر هغې چې پولیس یې په اړه ځواب ورنه کړي.»
عبدالله زیاتوي، چې پولیسو یې لیسنس ځنډولی و او د هغه لاسونه یې ورتړلي و.
هغه زیاتوي: «د پېښور د لینس ادارې زما لیسنس نه تایید کولو، زه تا په څلورو لاسونو ورته تړلی وم چې پرېږده دا سړی شهید شي.»
عبدالله شاکر همداراز وایي، دوی د مفتي شاکر د امنیت په نه تامیینولو غوښتل چې دی ومري. عبدالله شاکر د مفتي شاکر پر مینه والو غږ کړی، چی د لاریون لپاره دې ځانونه راورسوي.
هغه وایي: «دا کار د ډوزو نه د ډزو دی نن ما خپل پلار له لاسه ورکړ سبا ستاسو حال دی. سپي د سپو غوښې نه خوري ملایانو تاسو د ملایانو غوښې خورئ.»
عبدالله شاکر زیاته کړه: «زه په وینو سور شوم، په یاد ساتی دا خپله ککرې هم درباندې خورم تر څو چې زما د والد غم مو نه وي کړی.»
د پښتونخوا مشهور دیني عالم مفتي منیر شاکر مازیګر لمونځ لپاره جومات ته روان و، چې چاودنه پرې وشوه او په روغتون کې د درملني پرمهال مړ شو.
مفتي منیر شاکر دې وروستیو کې ویلي و، چې پاکستاني امنیتي ادارو ورته ویلي چې ژوند یې له ګواښ سره مخ دی او د خپل ځان د ساتلو لپاره تدابیر ونیسي.
نوموړي د پاکستان پر امنیتي ادارو هم نیوکې کړې وې، چې د ده د امنیت په برخه مرسته نه کوي.
تر اوسه پورې کومې وسله والې ډلې د برید مسوولیت پر غاړه نه دی اخیستی.
