د پخواني ولسمشر حامد کرزي د دفتر رییس کریم خُرم په غزه کې د اسراییل د وروستیو بریدونو په غبرګون وویل: «په ورانه شوې غزه په نیمه شپه کې یو وار بیا بمباريو کې د څه باندې ۴۰۰ انسانان د وژل کېدو د جنایت د غندلو لپاره د الفاظو قالب کوچنی دی.»
نوموړي د سېشنبه په ورځ په خپل اېکس کې لیکلي، چې له څه باندې یوه کال راهیسې د غزې پر تړانګې د نړۍ پرمختللي بمونه اوري او د زرګونونو انسانانونو په ګډون په دې سیمه کې حیوانات، کاڼې او بوټي سوځول کېږي.
نوموړي په نیوکې سره زیاته کړه، چې د غزې په خلکو برېښنا، اوبه، خواړه او درمل د جنګي وسیلې په توګه استعمالېږي او په خلکو بندېږي.
خُرم وایي: «دا کرښې د زړه د تسکین لپاره لیکم، کنه په غزه کې غمیزه تر هغه لویه ده او د اسراییلو ظلم تر هغه زیات دی چې الفاظ یې د بیان توان ولري.»
د پخواني ولسمشر حامد کرزي د دفتر رییس همداراز زیاته کړې: «تر یو کال زیاته موده وشوه چې د غزې په نرۍ تړانگې باندې د پرمختللې دنیا پرمختللي بمونه رااوري؛ انسان، حیوان، کاڼي او بوټي ته اور اچوي؛ برېښنا، اوبه، خواړه او درمل د جنګي وسیلې په توګه استعمالېږي او په خلکو بندېږي.»
کریم خُرم وایي، چې اسراییل د اوربند دویم پړاو ته د داخلېدو پر ځای نوي شرطونه وړاندې کړل او دا هېواد په منځني ختیځ کې ځان د غربی تمدن مدافع بولي، چې ګواکي د (وحشی تروریستانو) سره لاس او ګرېوان دی.
د هغه په خبره، اسراییل په همدې پلمه پر موافقه شوي اوربند او تقسیم اوقات پښه اېښې ده او د «نقض» په نوم یې په ورانه شوې غزه په نیمه شپه کې یو وار بیا بمبارۍ وکړل.
نوموړی دا څرګندونې داسې مهال کوي، چې نن سهار وختي اسراییل پر غزې له درې میاشتیني اوربند وروسته یو ځل بیا بریدونه وکړل، چې تر اوسه د ۴۱۲ کسانو د وژل کېدو راپورونه ورکړل شوي دي.
حماس ویلي، چې په دغو بریدونو سره د دوی او اسراییل ترمنځ اوربند نور مات دی.
د اسراییل د لومړي وزیر دفتر ویلي، دا اقدام حماس ته ځواب و، چې په غزه کې د بندي شویو کډوالو خوشې کولو ته تیار نه دی.
له دې سره، فلسطیني چارواکو هم تایید کړې، چې د اسراییل په بریدونو کې د حماس څلور جګپوړي غړي وژل شوي دی.
په بریدونو کې د فلسطین حکومت د چارو تعقیب رییس عصام الدعلیس، د عدلیې وزارت مرستیال احمد الحته، د کورنیو چارو وزارت مرستیال محمود ابو وطفه او د فلسطین د کورني امنیت رییس بهجت ابو سلطان وژل شوي.
