عمران خان د نوبل د سولې جایزې لپاره نوماند شوی دی
د پاکستان پخوانی لومړی وزیر عمران خان د بشري حقونو او ډیموکراسۍ لپاره د هڅو له امله د نوبل د سولې جایزې لپاره نومول شوی دی.
د پاکستان پخوانی لومړی وزیر عمران خان د بشري حقونو او ډیموکراسۍ لپاره د هڅو له امله د نوبل د سولې جایزې لپاره نومول شوی دی.
تېره ورځ د پاکستان نړۍوال اتحاد غړو خبر ورکړ، چې عمران خان یې د نوبل د سولې جایزې لپاره نومولی دی.
دغه اتحاد پر اېکس پاڼه کاږلي:« موږ په خوښۍ اعلانوو، چې د پاکستان پخوانی لومړی وزیر عمران خان د نوبل د سولې جایزې لپاره د هغه د کار له امله نومول شوی دی.»
عمران خان تر دې وړاندې هم په ۲۰۱۹ کال کې په سوېلي اسیا کې د سولې د هڅو لپاره د نوبل د سولې جایزې لپاره نومول شوی و.
هر کال د ناروې د نوبل کمیټه سلګونه نومونه ترلاسه کوي او وروسته بیا دوی د اتو میاشتو په اوږدو کې د یوې پروسې له لارې ګټونکی ټاکي.
عمران خان چې د پاکستان تحریک انصاف ګوند بنسټ اېښودونکی هم دی، د ۲۰۲۳ کال د اګست میاشتې راهیسې په بند کې دی.
نوموړی د واک څخه د ناوړه ګټې اخیستنې او د فساد په قضیه کې په ۱۴ کاله بند محکوم شوی دی.
دا د نوموړي خلاف څلورمه لویه قضیه ده، چې پرې محکوم شوی دی.
نوموړی تر دې وړاندې د دولتي ډالیو پلور، د دولتي رازونو افشا کولو او ناقانونه واده پورې په اړوندو درېیو قضیو محکوم شوی و.
خو عمران خان د هغه پر وړاندې ټول تورونه رد کړي او هغه سیاسي انګیزه یادوي.
