پاکستاني ورځپاڼې ډان راپور ورکړی، چې د کډوالو لپاره د ټاکلې مودې له ختمېدو سره سم د طالبانو حکومت د سې شنبې په ورځ له اسلام اباده غوښتي چې د افغان کډوالو د اېستلو لړۍ پیل نه کړي. په پام کې وه چې د اپریل په لومړۍ نېټه د پاکستان حکومت له دغه هیواده د افغان کډوالو ایستل پیل کړي.
د پاکستان د کورنیو چارو وزارت (د مارچ په ۶مه) په یوه بیان کې ویلي و، چې ټولو بې اسناده بهرنیانو او د اې سي سي کارت لرونکو کډوالو ته سپارښتنه کېږي، چې د ۲۰۲۵ کال (د مارچ تر ۳۱مې نېټې) پورې په خپله خوښه له دغه هېواده ووځي؛ کنه د اپرېل په لومړۍ نیټه به له جبري اېستلو سره مخ شي.
له بل پلوه د پاکستان دولتي راډیو په خپاره شوي راپور کې راغلي، چې د اړوندو کسانو په وړاندې سخت قانوني اقدام به اوس پیل شي.
په پاکستان کې د ملګرو ملتونو د کډوالو ادارې استازې فیلیپا کینډلر ویلي، پاکستان ۱.۵۲ مېلیونه راجستر شوي افغان کډوال او پناه غوښتونکي لري چې اټکل کېږي ۸۰۰ زره یې د اې سي سي کارت لرونکي دي.
د طالبانو د کډوالو او راستنېدونکو چارو وزیر مولوي عبدالکبیر هم له ګاونډیو هېوادونو غوښتي، چې د افغان کډوالو د اېستلو لړۍ ودروي او افغانانو ته اجازه ورکړي چې په خپله خوښه بېرته خپل هېواد ته ستانه شي.
هغه د کډوالو سره د انساني چلند پر اهمیت ټینګار کړی دی.
له بل پلوه د پښتونخوا لوړ پوړو چارواکو فدرالي حکومت ته سپارښتنه کړې وه، چې د اختر د رخصتیو په پام کې نیولو سره د اپرېل تر لسمې پورې د بېرته ستنیدو لړۍ وځنډوي.
خو د راپورونو له مخې، د پاکستان حکومت دغه لړۍ د روانې اپرېل میاشتې تر ۱۰مې نېټې ځنډولې ده.
د خیبر قبایلي ولسوالۍ څخه خبریال جواد شینواري ډان ورځپاڼې ته ویلي، چې په لنډي کوتل کې د چارواکو لهخوا جوړ شوي د کډوالو پنډغالي اوسمهال تړل شوي دي.
له بل پلوه په پاکستان کې د بشري حقونو ډلو له دغه هېواده د افغان کډوالو د اېستلو پرېکړه غندلې ده.
د پاکستان د بشري حقونو مدافع وکیلې مونیزه کاکړ خبرداری ورکړی، ډېری هغه افغان کډوال چې له کلونو راهیسې په پاکستان کې ژوند کوي؛ د دوی د بېرته ستنېدو سره به دوی له نامعلومه راتلونکې سره مخ شي.
د راپورونو له مخې، د ۲۰۲۳ کال د نومبر میاشتې راهیسې له پاکستانه له ۷۰۰زره ډېر افغانان له خپل هېواد ته ستانه شوي دي.
