د امریکا خزانې وزارت د یمن له حوثیانو سره د همکارۍ په تور په روسیه کې په مېشتو دوو افغان سوداګرو بندیز ولګاوه. دغه وزارت ویلي، دوی به په روسیه کې پر مېشتو ګڼ شمېر کسانو او ادارو بندیزونه پلي کړي چې د حوثي وسلهوالو لپاره یې د وسلو او نورو سرچینو په تدارکاتو کې مرسته کړې ده.
د دغه وزارت لهخوا په خپرې شوې خبرپاڼه کې راغلي، چې په دغو بندیزونو کې په روسیه کې د هوشنګ غیرت او سهراب غیرت په نومونو مېشت دوه افغان سوداګر چې په خپلو کې سره وروڼه هم دي، شامل دي.
د امریکا خزانې وزارت په وینا، دغو دوو کسانو د سعید احمد جمال په نوم د حوثیانو یو لوړپوړي مالي چارواکي سره مرسته کړې ده چې په ۲۰۲۱ کال کې پرې بندیزونه لګول شوي وو.
د خزانې وزارت ادعا کړې، چې دغه دوو افغان وروڼو د جمال په لارښوونه په ۲۰۲۴ کال کې د کریمیا څخه یمن ته د غلا شوې اوکرایني غلو لېږد ته اسانتیا برابره کړې وه.
د دغه وزارت لهخوا په خپرې شوې خبرپاڼه کې د دغو دوو افغان وروڼو په تړاو نور څه نه دي راغلي.
دغه بندیزونه وروسته له هغه لګېدلي، چې د امریکا او حوثیانو ترمنځ د یو بل پر وړاندې په بریدونو کې زیاتوالی راغلی دی.
حوثیانو ادعا کړې، چې د سې شنبې په ورځ یې په سیمه کې د امریکا د الوتکو وړونکې بېړۍ په نښه کړې ده.
د حوثیانو ویاند یحیی سریع د سې شنبې په ورځ هم ادعا وکړه، چې دغې ډلې یوه امریکایي MQ-9 بې پیلوټه الوتکه نسکوره کړې ده.
