د سپینې ماڼۍ د اقتصاد ملي شورا مشر کوین هَسِټ وایي، چې د تعرفو له لګولو وروسته څه باندې ۵۰ هېوادونو د سوداګریزو مذاکراتو د پیل لپاره له امریکا سره اړیکه نیولې ده.
العربیه هم راپور ورکړی، چې د متقابلو تعرفو د لګولو په اړه د ټرمپ د وروستۍ پرېکړې له امله د مصر او د خلیج د حوزې هېوادونو بورس بازارونه له سخت افت سره مخ شوي دي.
هَسِټ د یکشنبې په ورځ (د وري ۱۷مه) له اې بي سي شبکې سره په مرکه کې ټولو نیوکو ته په اشارې ټینګار کړی، چې دا پالیسي هېڅکله د مالي بازارونو د زیانمنولو یا د مرکزي بانک د فشار لاندې راوستلو لپاره نه ده غوره شوې، تر څو سود نرخونه راکم شي.
نوموړي زیاته کړه، چې پر مرکزي بانک به هېڅ ډول «سیاسي فشار» نه وي.
ترامپ د وري په ۱۵مه نېټه په ټولنیزو شبکو کې د یوې ویډیو په شریکولو سره دا اټکلونه نور هم پیاوړي کړل چې د هغه د تعرفو پالیسي د دې لپاره جوړه شوې، چې د سټاک پر بازارونو او همدارز پر مرکزي بانک د سود نرخونو د کمولو لپاره فشار راوړي.
دا په داسې حال کې ده، چې ټرمپ په دې اونۍ کې د سوداګریزو تعرفو په لوړولو سره مالي بازارونه ولړزول او د نړۍ ګڼ هېوادونه یې خپه کړل.
اخوا، زرګونو کسانو بیا په واشنګټن ډي سي او د امریکا په بېلابېلو ښارونو کې د امریکا د ولسمشر ډونالډ ټرمپ او د هغه د شتمن ملاتړي اېلان ماسک پر ضد لاریونونه کړي.
د لاریونونو تنظیموونکو رویترز ته ویلي، چې نږدې ۱۵۰ ډلو په دغو مظاهرو کې د ګډون لپاره نوم لیکنه کړې وه او یادې مظاهرې د امریکا د ټولو ایالتونو تر څنګ په کاناډا او مکسیکو کې هم پلان شوې وې.
په امریکا کې له لاریونونو وړاندې په اروپا کې مېشتو امریکایانو هم د ډونالډ ټرمپ د کورنيو او بهرنيو پالیسیو غندلو په موخه په برلین، فرانکفورټ، پاریس او لندن کې لاریونونه وکړل.
