په کندهار کې د طالبانو د چاپيريال ساتنې اداره وایي، چې د وحشي ژویو، نایابه مرغانو او کبانو د ښکار په تور يې په بېلابيلو سېمو کې ۳۳ کسان نيولي دي. دغې ادارې ويلي، چې په نیول شويو کسانو کې ۲۵ کسانو مرغان او اتو تنو کبان ښکار کول، چې یو شمېر تر تعهد وروسته خوشي شوي دي.
په کندهار کې د طالبانو د چاپيريال ساتنې ادارې ویلي، چې د طالبانو امنيتي ادارو دغه کسان په ښار او ولسوالیو کې د مرغانو او کبانو د ښکار پر مهال نيولي دي.
د طالبانو د چاپيریال ساتنې ادارې د مسوولینو په وینا، له نیول شویو کسانو څخه یې يو شمېر تر تعهد وروسته خوشي کړي دي.
طالبانو زياته کړې: « په نيول شويو کسانو کې اته تنه د ماهيانو او ۲۵ تنه د بيلا بيلو حيواناتو لکه غرني پسونه او مختلفو مرغانو لکه بازانو، زرکو او نورو الوتونکو مرغانو په تور نيول شوي او یو شمېر د تعهد له مخې بيرته ايله شوي دي.»
طالبانو خلکو ته خبرداری ورکړی، چې له ښکار کولو ډډه وکړي او که نه له قانوني چلند سره به مخ شي.
د طالبانو د رییس الوزرا د ۱۱۴ ګنې فرمان له مخي، په ټول هېواد کې د مرغانو پر ښکار او قاچاق بنديز لګول شوی.
واک ته د طالبانو په رسېدو سره که څه هم دغه ډله د مرغانو او حيواناتو د ښکار د مخنیوي په برخه کې د پر وخت اقداماتو خبر ورکوي خو لا هم په ډېرو سېمو کې د مرغانو د ښکار مخه نه ده نيول شوې.
تېر کال ځینې راپورونه خپاره شوي وو، چې شاوخوا ۷۰ تنه عربان له ګران بیه موټرو او پر مختللو وسایلو سره د کندهار، هلمند او فراه په ولایتونو کې د نادره مرغانو ښکار کوي.
هغه مهال د سیمې اوسیدونکو ويلي و، چې یاد کسان د قطر اوسېدونکي دي او هغه وخت په ښار کې لیدل شوي وو، چې خوراکي او نور د اړتیا وړ توکو د اخیستو لپاره د دغو ولایتونو ښارونو ته تللي وو.
