سرګي لاوروف: هڅې کیږي چې د ناټو پوځي بنسټونه بېرته افغانستان ته راوستل شي

د افغانستان پخواني ولسمشر حامدکرزي د چهارشنبې په ورځ پر خپله اېکس پاڼه د هند په کشمېر کې پر سېلانیانو بريد غندلی او لیکلي يې دي: «د هند په جمو او کشمېر کې پر ملکي وګړو ترهګريز برید په کله غندم، د قربانیانو کورنيو، د هند خلکو او حکومت ته خواخوږي وړاندې کوم.»

طالبانو هم نن دغه برید غندلی او اندېښنه یې ښودلې، چې دغه ډول پېښې د سيمې امنیت او ثبات ته ګواښ پېښوي.

د سې شنبې په ورځ د هند په کشمېر کې په یوه وسله وال بريد کې ۲۶ تنه سیلانیان وژل شوي او ۱۷ ټپيان دي.

د هند لومړي وزیر خپل د سعودي عربستان سفر پای ته رسولی او نوي ډيلي ته له ستنېدو سره هممهاله یې د پېښې په اړه ځانګړې ناسته غوښتې ده.

د طالبانو د کورنیو چارو وزارت اداري کمیسیون د چهارشنبې په ورځ په یوه اعلامیه کې ویلي، چې د هبت الله د نوي فرمان له مخې په دریو ولایتونو کې د ولسوالیو جوړېدل له سیاسي، ټولنیز او پوځي پلوه ګټور دي.

د لغمان امنیه قوماندان نجیب الله بدخشي په دغه ولایت کې د فراشغان په نوم د تازه جوړې شوې ولسوالۍ په اړه ویلي: «د یادې ولسوالۍ د منظوریدو او د لغمان ولسونو د امنیت او مشکلاتو د حل په موخه يې ډیرې هلې ځلې ترسره کړې او د مشرتابه د حکم او ځانګړی شفقت په بنا منظور شوه.»

طالبانو زیاته کړې، چې ژر به دغه ولسوالۍ ګټې اخيستنې ته وسپارل شي.

واک ته د طالبانو له رسېدو وروسته دغې ډلې په یو شمېر نورو سیمو کې هم ولسوالۍ او تشکیلات جوړ کړي خو تر اوسه یې رسمي کړي لا نه دي خو له دولتي بوديجې څخه ورته مصارف ورکول کيږي.

د طالبانو د کورنیو چاورو وزارت د یوې خبرپاڼې په خپرولو سره ویلي، چې سراج الدین حقاني د روسیې د ولسمشر له ځانګړي استازي ضمیر کابلوف سره د لیدنې پرمهال د افغانستان او سیمي د امنیت، اقتصاد او سوداګریزو همکاریو په اړه خبرې وکړې.

په خبرپاڼه کې ویل شوي، چې حقاني د طالبانو په اړه د روسیې وروستي اقدامات ستایلي او دواړو د ډیپلوماتیکو اړېکو لوړولو ، امنیتي او سوداګریزو همکاریو ژمنې وکړې.

ضمیر کابلوف له سراج الدین حقاني څخه مخکې د طالبانو د بهرنیو چارو وزیر امیرخان متقي سره لیدلي او دواړو د دوو اړخییزو اړېکو، اقتصادي او سوداګریزو همکاریو پر پراختیا خبرې کړې دي.

له کورنیو چارو وزارت څخه تر شاوخوا درې میاشتني غیابت وروسته کابلوف لومړنی بهرنی لوړ پوړی چارواکی دی چې سراج الدین حقاني ورسره ګوري.

د افغانستان د مخکیني جمهوري نظام لومړي مرستیال امرالله صالح د چهارشنبې په ورځ پر خپله اېکس پاڼه لیکلي، چې د ملي بیرغ د بدلولو واک لویه جرګه لري او یوازې اساسي قانون ملي بیرغ ښه تعریفولی شي.

صالح زياته کړې: «یوازينۍ اداره چې د افغانستان د ملي بیرغ د بدلولو واک لري، لویه جرګه یا ټول پوښتنه ده او یوازې اساسي قانون ملي بیرغ ښه تعریفولی شي.»

صالح ویلي، چې په نړۍ کې ګوندونه او حرکتونه ځان ته د خاص بیرغ ټاکلو حق لري خو د ملي سمبول په توګه نه پېژندل کېږي.

د نوموړي په وینا، د ملي بیرغ د توهين او سپکاوي هڅې پایلې نه ورکوي، « د دې بیرغ د توهين یا سپکاوي هره هڅه به نه یوازې بې ګټې وي، بلکې د مخالفینو د انزوا لامل به هم شي.»

په ټولنیزو رسنیو کې د یو شمېر کسانو او کړیو له خوا ملي بیرغ ته د سپکاوي او توهين ویډیوګانې خپرې شوې دي.

دغه کړنه په برېټانیا کې د افغانانو فعالې نړېوالې شورا هم غندلې ده.

شورا په یوه خبرپاڼه کې ملي بیرغ ته سپکاوي کوونکي پردي پال بللي دي.

په افغانستان کې واک ته د طالبانو له رسېدو وروسته دې ډلې هم د افغانستان د درې رنګه ملي بیرغ پر ځای د خپل تحریک بیرغ پورته کړی او پر ملي بیرغ یې بندیز لګولی دی.

د جرمني د بهرنیو چارو وزارت د چارشنبې په ورځ ددغه هېواد رسنیو ته ویلي چې د ۲۶۰۰ پاتې افغانانو د انتقال برخلیک، چې د جرمني پخواني محلي همکاران او د هغوی د کورنیو غړي پکې شامل دي، نوی حکومت پرمخ وړي.

د ډویچلندفونک د رپوټ له مخې، د راتلونکو الوتنو په اړه پرېکړه به ښايي د نوي حکومت له جوړېدو وروسته وشي، چې تمه ده د مې میاشتې په پیل کې کار پیل کړي.

د سوسیال دیموکرات او شنو ګوندونو سرپرست حکومت تر دې وړاندې یو شمېر الوتنې تنظیم کړې وې، خو دا چاره د سوسیال مسیحي دیموکراتانو له نیوکو سره مخ شوه او اوس ویل کیږي ځنډېدلې دي.

د جرمني ډي پي اې اژانس د سې شنبې په ورځ د دغه هېواد د امنیتي سرچینو په حواله خبر ورکړ، چې د چارشنبې ورځې پلان شوې الوتنې په اړه تر اوسه اړندو ادارو معلومات نه دي ور کړي، نو تمه نه کیږي، چې دغه الوتنه دې ترسره شي.

د نیدرزاکسن ایالتي ادارې یوه ویاند تایید کړه چې افغانان به نور د فریدلند ترانزیتي کمپ ته نه وروستل کېږي. دا کمپ د نویو راتلونکو لپاره د لنډمهاله استوګنې ځای دی او هلته یې تر داخلېدو دوه اونۍ وروسته نورو ایالتونو ته استوي.

وروستيو چارټر الوتنو افغانان برلین، هانوفر او لایپزیګ ته انتقال کړل، خو هغه نورې الوتنې چې په اپرېل کې پلان شوې وې، لغو شوې دي.

په جرمني کې د افغانانو پر انتقال نیوکې په دې وروستیو کې ډېرې شوې او د ټاکنو ګټونکي ګوند سي ډي یو له خپل ایتلافي ګوند اېس پي ډي سره په هوکړه لیک کې دې ته اشاره کړې، چې د منلو پروګرامونه به تر ممکنه حده محدودیږي او نوي پروګرامونه به نه پیلوي.

تېره چارشنبه د لایپزیګ په هوايي ډګر کې یوه الوتکه راکوزه شوې وه چې ۱۳۸ افغانان یې جرمني ته ولېږدول.

تر دې مخکې، د همدغه کال په اوږدو کې څو ورته الوتنې شوې دي، چې ټولټال پکې۴۶۱ کسان جرمني ته لیږدول شوي دي.