ډونالډ ټرمپ: په ټول چین کې فابریکې بندېږي ځکه موږ یې محصولات نه اخلو
د امریکا ولسمشر ډونالډ ټرمپ وايي چې د چین له ولسمشر شي جینپینګ سره یې ډېره مینه ده او زیاتوي چې « موږ به یو تړون وکړو».
ټرمپ د خپلې کابینې غونډې ته وویل: «زه پوهېږم چې چین اوس ډېر خراب اقتصادي وضعیت لري. ما ځینې رپوټونه ولیدل او زه نه غواړم دا حالت پر چین راشي. زه په حقیقت کې خواشینی شوم چې دا مې واورېدل».
هغه زیاتوي چې له شي جینپینګ سره ښې اړیکې لري او دواړه هېوادونه له یو بل سره خبرې کوي.
د سکای نیوز د رپوټ له مخې، ټرمپ دا ادعا هم کوي چې « په ټول چین کې فابریکې بندېږي، ځکه موږ د دوی محصولات نه اخلو».
هغه وايي: « موږ د دوی محصولات نه غواړو، تر څو چې له موږ سره عادلانه چلند ونه کړي، دا پکې فکري ملکیت او نور مهم مسایل هم شامل دي».
رپوټونه وايي، چې د ټرمپ د وروستیو تعرفو له امله په چین کې یشمېر کمپنۍ له ستونزو سره مخ شوې دي.
