د طالبانو د عامې روغتیا وزارت د کونړ د مرکز اسعداباد په ولایتي روغتون کې د ښځو د عملیات خونې نوې څانګه له ښځو پرته پرانیسته. طالبانو ویلي، دغه څانګه د «هېلټ نېټ» موسسې له خوا د ۱.۸ مېلیونه افغانۍ په مالي لګښت جوړه شوې ده.
د طالبانو د عامې روغتیا وزارت ویلي، چې دا عملیاتي مرکز په بېلابېلو طبي او غیر طبي تجهیزاتو سمبال دی.
د طالبانو د خپرو شویو انځورونو له مخې، د دې ډلې لسګونو غړو د ښځو د دې مرکز د پرانیستلو په مراسمو کې ګډون کړی و؛ خو په دوی کې هېڅ ښځه نه وه.
طالبانو د ښځو پر طبي زده کړو بندیز لګولی او په روغتونونو کې یې د جنسیت جلاوالی رامنځ ته کړی دی.
د طالبانو تر کنټرول لاندې افغانستان په نړۍ کې د مور او ماشوم د مړینې لوړه کچه لري.
له محرم پرته د ښځو په تګ و راتګ محدودیتونه، د دولتي ادارو د ښځینه کارکوونکو د معاشونو کمول، د امریکا د مرستو بندېدو، د سلګونو روغتیايي مرکزونو تړل کېدل، په افغانستان کې د کم عمره نجونو ودونو، د روغتیايي خدماتو نشتوالي د مېندو او ماشومانو د مړینې بحران لا زیات کړی دی.
یونېسف د روان کال په وري میاشت کې خبرداری ورکړ، چې که د ښځو په طبي زده کړو بندیز دوام وکړي، نو سږ کال به له ۵۰۰۰ څخه زیاتې مېندې او ماشومان مړه شي.
ملګرو ملتونو په دې وروستیو کې وویل، کندهار یو له هغو ښارونو څخه دی چې په نړۍ کې د ماشومانو د مړینې لوړه کچه لري.
د ملګرو ملتونو د ماشومانو صندوق وايي. چې د طالبانو د مشر د استوګنې ځای، کندهار ولایت کې د ماشومانو د مړینې کچه د افغانستان د ملي اوسط څخه لوړه ده.
یونېسف خبرداری ورکړی، چې په افغانستان کې د ملاتړو بودیجې کمښت ممکن په هېواد کې د ماشومانو د مړینې د زیاتوالي لامل شي.
