له پاکستانه د افغان کډوالو د جبري ستنولو د پروګرام پر دوام دغه هېواد د دوشنبې په ورځ (د غویي ۲۹مه) د تورخم او انګور اډې له لارو ۶۹۰ افغان کډوال افغانستان ته ستانه کړي دي. په دغو کډوالو کې د ای سي سي کارټ لرونکي او بې اسناده کډوال شامل وو.
د خېبرپښتونخوا حکومت له خوا په یوه اعلامیه کې راغلي، چې په دغه کډوالو کې ۱۴۲ کسان د اې سي سي کارټ لرونکي وو او ۵۴۸ هغه کسان وو، چې په پاکستان کې یې د اوسېدو لپاره قانوني اسناد نه درلودل.
اعلامیه وړاندې زیاتوي، چې له دغه ډلې ۱۷ افغان کډوال د سوېلي وزیرستان انګور اډې له لارې افغانستان ته ستانه کړای شوي او پاتې نور د تورخم له لارې اېستل شوي دي.
د خېبرپښتونخوا ایالتي حکومت د معلوماتو له مخې، تر اوسه نږدې ۴۴ زره او ۸۶۵ افغان کډوال چې نږدې ۳۶ زره یې د اې سي سي کارټ لرونکي وو او پاتې ۱۹ زره او ۸۹۰ هغه کسان وو چې په پاکستان کې یې د اوسېدو لپاره هېڅ ډول اسناد نه درلودل له دغه هېواده اېستل شوي دي.
افغان کډوال په پاکستان کې د پولیسو له خوا له دوی سره د توند برخورد شکایتونه کړي او په یو شمېر سیمو کې بیا افغان کډوالو ویلي، چې د ځایي چارواکو له خوا د دوی شتمني دوی ته نه پرېښودل کېږي چې له ځان سره یې یوسي.
یاده دې وي، چې د طالبانو د بهرنیو چارو سرپرست وزیر امیر خان متقي د اپرېل په ۱۹ نېټه په کابل کې د پاکستان د بهرنیو چارو وزیر اسحاق ډار، سره په لیدنه کې د افغان وګړو د بېرته ستنېدو په اړه اندېښنې څرګندې کړې دي.
هغه له پاکستانه غوښتي، چې د افغان کډوالو حقونه وساتي او هغوی ته اجازه ورکړي چې خپل مالونه له پاکستانه بېرته افغانستان ته انتقال کړي .
له ۲۰۲۳ کال راهیسې د پاکستان حکومت د افغان کډوالو د بېرته ستنېدو یوه پراخه پروسه پیل کړې، چې تر اوسه پورې یې د پام وړ افغانان خپل هېواد ته جبري ستانه کړي دي.
په افغانستان کې د کډوالو اړوند ادارو د معلوماتو له مخې، له ۲۰۲۳ کال نه تر اوسه له یو مېلیون څخه زیات افغان کډوال پاکستان جبري افغانستان ته ستانه کړي دي..
