د پاکستان د بهرنیو چارو وزارت وایي، چې د دغه هېواد د لومړي وزیر مرستیال او د بهرنیو چارو وزیر اسحاق ډار د چین لهخوا د پاکستان د «ملي حاکمیت او ځمکنۍ بشپړتیا» په برخه کې د ملاتړ ستاینه کړې ده.
که څه هم د پاکستان د بهرنبو چارو وزارت د دغه ملاتړ په اړه ډېر وضاحت نه دی ورکړی؛ خو د راپورونو له مخې له هند سره په وروستۍ شخړه کې پاکستان د عملیاتو پرمهال د چین جنګي الوتکو څخه کار اخیستی و.
د پاکستان ډان ورځپاڼې راپور ورکړی، چې اسحاق ډار په بیجینګ کې د چین د کمونېست ګوند د نړۍوالو چارو له وزیر لیو جیانچاو سره لیدلي دي.
د راپور له مخې، دواړو مشرانو په دغه لیدنه کې د پاکستان د سیاسي ګوندونو او د چین د کمونېست ګوند ترمنځ د اړیکو پر پراختیا هوکړه وکړه.
ښاغلي لیو بیا ویلي، چې پاکستان د چین «ستراتیژیک همکار» او «اوسپنیز ملګری» دی.
نوموړي دارنګه له اسلام اباد سره د بیجېنګ د اړیکو پر لومړیتوب ټینګار کړی.
اسحاق ډار تېره ورځ د چین د بهرنیو چارو وزیر وانګ یي په بلنه په درې ورځني رسمي بیجېنګ ته ولاړ.
په راپور کې راغلي، چې اسحاق ډار به د دغه سفر په لړ کې له خپل چینایي سیال سره د سویلي اسیا د سیمهییز وضعیت د پراختیا او پر سولې او ټیکاو د هغې د اغېزو په اړه خبرې وکړي.
راپور زیاتوي، چې دواړه خواوې به د پاکستان او چین د دوه اړخیزو اړیکو اړخونه هم وڅېړي او د دوه اړخیزو ګټو سیمهییزو او نړۍوالو پرمختګونو په اړه به هم نظرونه تبادله کړي.
تمه کېږي، چې د طالبانو د بهرنیو چارو وزیر امیر خان متقي به هم په بیجینګ کې د سیمهییزې سولې او امنیت په اړه په دغه خبرو اترو کې برخه واخلي.
