پاکستان: په غزه کې د اسراییل دوامداره بریدونه په کلکه غندو

د پاکستان بهرنیو چارو وزارت وایي، چې د غزې په تړانګه کې د اسراییل دوامداره بریدونه چې په پایله کې یې په سلګونو فلسطینیان وژل شوي په کلکو ټکو غندي. د دغه وزارت په خبرپاڼه کې راغلي: «اسراییل په قصدي ډول روغتونونه او نورې مهمې زیربناوې په نښه کوي چې د نړیوال قانون خلاف عمل دی.»

خبرپاڼه زیاتوي، چې په غزه کې د اسراییل د ځمکنیو عملیاتو پراختیا، او همدارنګه د غزې د «بشپړ کنټرول په لاس کې اخیستلو» اعلان، په سیمه کې د سولې او ثبات ترلاسه کولو هڅې له یوه جدي ګواښ سره مخ کړي دي.

سربیره پردې، اسراییل په قصدي ډول د جدي اړتیا وړ میلیونونو خلکو ته د بشري مرستو رسولو مخه نیسي، چې دا په محاصره شویو فلسطیني وګړو باندې د ډله ییزې سزا د لګولو په معنا ده.