پښتونخوا کې د کال په لومړیو څلورو میاشتو کې ۱۱۶ ښځې وژل شوې دي
په خېبرپښتونخوا کې د روان ۲۰۲۵ کال په لومړیو څلورو میاشتو کې ۱۱۶ ښځې د کورني تاوتریخوالي، پخوانیو دښمنیو او نورو بېلابېلو پېښو له امله وژل شوې دي. په دې موده کې یوازې ۴۰ ښځې په مردان کې وژل شوې دي.
پاکستاني رسنیو د خېبرپښتونخوا د پولیسو په حواله راپور ورکړی چې دا وژنې د جنورۍ او اپرېل میاشتو ترمنځ شوي او تر دې دمه ۱۴۷ کسان په دې پیښو کې د لاسلرلو په تور نیول شوي دي.
د ښځو د وژنې ترټولو ډېرې پېښې په مردان سیمه کې ثبت شوي چې پهکې ۴۰ ښځې وژل شوې دي. تر هغې وروسته، په ملاکنډ ۲۹، پېښور ۱۹، بنو ۱۳، هزاره ۸ او کوهاټ کې ۷ ښځې وژل شوې دي.
جیونیوز د خېبرپښتونخوا د پولیسو مشر ذوالفقار حمید په حواله ادعا کړې چې له دې وروسته د ښځو د خونديتوب لپاره ځانګړي تدابیر نیول کېږي. د هغه په وينا، د پوليسو په حوزو کې «ځانګړي ځایونه» جوړ شوي دي چې هغوی وکولای شي په اسانۍ سره خپل شکايتونه ثبت کړي.
ذوالفقار همداراز ټینګار کړی چې په پښتنه ټولنه کې ښځو ته درناوی کېږي او پولیس هڅه کوي هغوی ته هراړخیز ملاتړ برابر کړي. هغه ادعا کړې چې د عدالت د تأمین لپاره د ښځو د وژنو یو شمېر عاملان عدلي او قضايي ارګانونو ته سپارل شوي دي.
د شنونکو په اند، په خېبرپښتونخوا کې د ۲۰۲۵ کال په لومړیو څلورو میاشتو کې د ۱۱۶ ښځو وژل کېدل نه یوازې یو جنایي راپوردی ، بلکې د تاوتریخوالي، دښمنیو او جنسیتي نابرابرۍ هغه ژوره ستونزه را برسېره کوي چې لا هم په دې ټولنه کې دوام لري.