د پښتون ژغورنې غورځنګ د یوه فعال غړي د خپاره شویو معلوماتو لهمخې، د مې میاشتې له ۱۱مې راهیسې د خېبرپښتونخوا په بېلابېلو سیمو کې د پاکستاني پوځ د بېپیلوټه الوتکو د شپږو هوايي بریدونو په ترڅ کې ۴۰ کسانو ته مرګژوبله اوښتې ده.
د رحیم وزیر په وینا، د دغو بریدونو په پایله کې لږترلږه ۱۰ کسان وژل شوي او ۳۰ نور ټپیان دي.
ویل کېږي، چې په ټپیانو کې شپږ ښځې او ګڼ شمېر ماشومان هم شامل دي.د دغه غورځنګ فعالانو د پښتنو په مېشتو سیمو کې د پاکستاني پوځ د عملیاتو د زیاتوالي په تړاو اندېښنه ښودلې او ټینګار یې کړی، چې په دې بریدونو کې ملکيان تر ټولو ډېر زیانمن کېږي.
ورته مهال، پېژندل شوي پښتون سیاستوال افراسیاب خټک د دې وضعیت په غبرګون کې پر خپلې اېکسپاڼې لیکلي دي:«که چېرې د رسنیو ملګري له مبارکیو ویلو لږ فارغ شي، نو ښه به دا وي چې د خېبرپښتونخوا د هغو ډرون بریدونو هم پوښتنې وکړي، چې پر خلکو شوي او د هغو پلرونو پر حال هم فکر وکړي چې د خپلو کوچنیانو درنې جنازې په اوږو وړي.»
د یادونې ده، چې له تېرو څو کلونو راهیسې خېبرپښتونخوا په ځانګړې ډول وزیرستان سیمه د ترهګرۍ په نوم د پاکستاني پوځ د پرلهپسې هوايي بریدونو شاهده ده.
دا په داسې حال کې ده، چې پرون د پاکستان دفاع وزیر خواجه اصف د همدې بریدونو په تړاو د یوه خبریال پوښتنې ته له ځوابویلو ډډه وکړه.
