حنیف پشتین: که تر دوشنبې د میرعلي پرلت غوښتنې ونه منل شوې، نوې پرېکړه به اعلان کړي

د پښتون ژغورنې غورځنګ غړو او د میرعلي پرلت ګډونوالو ګواښ کړی، که تر سبا دوشنبې (د غبرګولي ۵مې) پورې یې غوښتنې ونه منل شي، نو د راتلونکي لپاره به خپله پرېکړه اعلان کړي.

د پښتون ژغورنې غورځنګ د رهبرۍ غړي حنیف پشتین په خپل اېکس کې لیکلي: «که تر سبا پورې د میرعلي پرلت غوښتنې ونه منل شوې نو ولسونه د راتلونکي لایحې عمل لپاره خپله نوې پرېکړه اعلانوي. د وخت په سیمه نېټ پرې شوی دی، د وزیرستان ټول ولسونه باید پرلت کې پراخ ګډون ترسره کړي، روان پرلت زموږ د مظلومیت او د حاکمانو د جبر په وړاندې اختجاج دی.»

دا په داسې حال کې ده، چې د خېبر پښتونخوا د بنو ولسوالۍ خلکو د تېرې دوشنبې په ورځ د امن ولسي پاڅون پیل کړ.

د دغه پاڅون موخه په سیمه کې روانه ناامني، د فرمان الله په نوم د یو استاد اختطاف او د پاکستاني حکومت له خوا د پښتون ژغورنې غورځنګ د رهبرۍ غړي صمدخان غېرقانوني نیونه بلل شوې ده.
د خېبرپښتونخوا د دغه ولسوالۍ خلک د روانو پرله پسې ناامنیو له امله شکایت کوي.
بنو او د خېبر پښتونخوا زیات شمېر سیمې د پخوا په پرتله ډېرې نا امنه شوي او وخت ناوخت ترې د وسله والو د فعالیتونو خبرونه ترلاسه کېږي.