د طالبانو د رياستالوزرا اقتصادي مرستيال ملا عبدالغني برادر ویلي، چې صنعت د هر هېواد د پرمختګ مهمه وسيله ده او دغه ډله د هېواد صنعتي کېدو لپاره مهمې موخې څاري او هڅه کوي، چې د بهرنيو وارداتو پر ځای کورني تولیدات او محصولات لا ډېر کړي.
نوموړي دغه څرګندونې نن سې شنبه (د غبرګولي ۶مه) د صنعت اوونۍ څلورم ملي او نړۍوال نندارتون په پرانيست غونډه کې کړې دي.
هغه دارنګه له خلکو غوښتي، چې له کورنیو تولیداتو او محصولاتو څخه ګټه واخلي.
هغه ادعا کړې، چې دا مهال افغانستان په ۱۳۸ صنعتي او تولیدي برخو کې ځان بسیاینې ته رسېدلی دی.
په دغې غونډه کې بیا د طالبانو د صنعت او سوداګرۍ وزير نورالدین عزيزي ویلي، چې د افغانستان ټول تولیدات معياري او باکيفيته دي.
هغه له پانګهوالو غوښتي، چې د افغانستان په بېلابېلو برخو کې پانګونه وکړي او د هېواد په ځان بسياينه کې خپل مسوولیت ادا کړي.
د طالبانو د رياستالوزرا اداري مرستيال عبدالسلام حنفي بیا په دغې غونډه کې د وینا پرمهال ویلي، چې دوی په هېواد کې د صنعت ودې او د صنعتکارانو ملاتړ ته ژمن دي او په دې برخه کې به لازمې اسانتياوې برابرې کړي.
هغه دارنګه له سوداګرو او صنعتکارانو غوښتي، چې د توکو په توليد او توريد کې دې نړۍوالو معيارونو او کيفيت ته پاملرنه وکړي.
وړاندې بیا د افغانستان د کانونو او صنايعو خونې مشر شېرباز کمينزاده ویلي، چې افغانستان په ۱۶۸ سکټورونو کې ځان بسياينې ته رسېدلی او اوسمهال د هېواد په کچه ۶۵۰۰ فابريکې فعالیت لري چې په کې شاوخوا ۴۲۰ زره کسان په کار بوخت دي.
د دغې ډلې د اقتصاد وزیر دین محمد حنیف هم په یادې غونډه کې ویلي، چې په افغانستان کې پانګونه په خپله د پانګهوالو په ګټه ده او اوسمهال په هېواد کې د صنعت د ودې او پانګونې لپاره شرایط تر بل هر وخت ډېر برابر شوي دي.
واک ته د طالبانو له رسېدو وروسته دغې ډلې تر بلې هرې برخې صنعت او سوداکرۍ برخې ته ډېر پام کړی دی.
پر طالبانو نیوکې دي، چې دغه ډله په خپله افغانانو ته د کاري فرصتونو په برابرولو کې پاتې راغلې او تر ډېره غواړي چې د پانګهوالو له لارې دغه ستونزې حل کړي.
