طالبان: تېره ورځ له ایران او پاکستان نه تر ۷۰۰ ډېرې کورنۍ افغانستان ته راستنې شوې

د طالبانو تر واک لاندې باختر اژانس خبر ورکړی، چې تېره ورځ له ایران او پاکستان څخه ۷۵۲ کورنۍ بېرته افغانستان ته راستنې شوې دي. وايي، د دغو کډوالو ډیره برخه له ګاونډیو هیوادونو په جبري ډول ایستل شوې دي.

دغه اژانس پر اېکس پاڼه کاږلي، چې پرون د ننګرهار ولایت د تورخم له لارې ۵۳ کورنۍ، د کندهار ولایت د سپین بولدک له لارې ۵۰، د نيمروز د ورېښمو پله له لارې ۱۹۲ او د هرات د اسلام کلا له لارې ۴۵۷ کورنۍ بېرته راستنې شوې دي.
له بل پلوه بیا په پاکستان کې د ملګرو ملتونو د کډوالو عالي کمېشنري وایي، چې تېره ورځ ۸۸۰ تنه بې اسناده افغان کډوال د تورخم له لارې افغانستان ته ستانه کړای شوي دي.
د دغې ادارې ویاند قېصر اپریدي ویلي، چې دغه کسان د پنجاب او پښتونخوا په بېلابېلو سیمو کې له اسنادو پرته مېشت وو.
د هغه په وینا؛ له دې ډلې شاوخوا ۶۲۳ کسانو د اې سي سي کارتونه لاره.
هغه زیاته کړې، چې یوازې په تېره میاشت کې ټولټال ۱۴۴ زره او ۵۰۰ بې اسناده افغانان له پاکستان څخه بېرته افغانستان ته ستانه شوي دي.
دغې ادارې تېره ورځ هم په یو راپور کې ويلي و، شاوخوا ۱۱۰ زره کډوال او پناه غوښتوونکي چې دا مهال په پاکستان کې مېشت دي؛ له هغو کسانو څخه دي، چې په خپل هېواد کې په لوړه کچه ګواښونو سره مخ دي.
د پاکستان ډان ورځپاڼې په دې اړه لیکلي و، چې د دغو کسانو له ډلې لږ تر لږه ۸ سلنه یې د ملګرو ملتونو د راجستر یا (PoR) کارټونه لري.