نتنیاهو: خامنهيي د ایران او امریکا د خبرو پر مهال د اسراییل د له منځه وړلو ټویټونه کوي
د اسراییل لومړی وزیر بنیامین نتنیاهو وایي، چې د ایران مذهبي مشر علي خامنهيي له امریکا سره د مذاکراتو په درشل کې د اسراییل د له منځه وړلو په اړه ټوېټونه کوي.
نوموړي یوه کنفرانس کې د وینا پرمهال د اسراییل د له منځه وړلو په اړه د ایران د غوښتنې په تړاو خبرداری ورکړ او ویې ویل: «په داسې حال کې چې د ایران او امریکا تر منځ خبرې روانې دي، خامنهيي ټوېټ کوي چې اسراییل باید له منځه یووړل شي. هغه دا خبرې په بشپړ ډول څرګند او بېپرده کوي.»
د شنونکو په باور، اسراییل پر ایران د برید لپاره د پلمې په لټه کې دی.
له دې سره، د سپینې ماڼۍ یوه لوړپوړي چارواکي بیا د سې شنبه په ورځ والانیوز ته ویلي، چې ډونالډ ټرمپ د مذاکراتو په درشل کې د ایران پر اټومي تاسیساتو د اسراییل له احتمالي برید څخه اندېښمن دی.
نوموړي د ټرمپ له قوله زیاته کړې، چې که اسراییل پر ایران برید وکړي نو د روانو مذاکراتو پر بهیر به منفي اغېز وکړي.