وېکرم مسري له امریکایي چارواکي سره د مخ پر ودې ټکنالوژۍ پر دوه اړخیزو همکاریو خبرې کړې دي

په واشنګټن کې د هند سفارت خبر ورکړی، چې د هند د بهرنیو چارو مرستیال وزیر وېکرم مسري د امریکا د بهرنیو چارو مرستیال وزیر جېفري کېسلر سره په لیدنه کې د مخ پر ودې ټکنالوژۍ پر دوه اړخیزو همکاریو خبرې کړې دي.

د دغه سفارت په خبره؛ په دغه لیدنه کې د مخ پر ودې ټکنالوژۍ د دوه اړخیزه همکاریو پر ودې خبرې شوې دي.
تر دې وړاندې د هند بهرنیو چارو وزارت د دوشنبې په ورځ په یوه بیان کې ویلي و، چې ښاغلی مسري (د مئ په ۲۷مه) واشنګټن ډي سي ته سفر کوي؛ ترڅو د امریکا له لوړپوړو چارواکو سره وګوري.
دغه سفر داسې مهال کېږي، چې د پاکستان لومړی وزیر شهباز شریف هم د سیمې هېوادونو ته د «مننې» په سفر وتلی.