طالبان: ګاونډي هېوادونه دې زمونږ په کورنیو چارو کې لاسوهنه نه کوي
د طالبانو د ریاست الوزرا اداري مرستیال عبدالسلام حنفي وایي، چې ګاونډي هېوادونه دې د افغانستان په کورنیو چارو کې لاسوهنه نه کوي. هغه ټینګار وکړ، چې طالبان له خپلو ګاونډیو سره ښې اړیکې غواړي او دغه ډله د ګاونډیو هیوادونو په کورنیو چارو کې لاسوهنه نه کوي.
سلام حنفي، د طالبانو په اړه د ترکي ژبو هېوادونو سازمان مخکنیو څرګندونو ته په غیر مستقیم ډول ځواب ویلو سره وویل: «زمونږ اړیکې له ګاونډیو او د سیمې هېوادونو سره په متقابل احترام ولاړې دي، موږ د چا په کورنیو چارو کې لاسوهنه نه کوو، خو له نورو هم غواړو چې زمونږ په چارو کې مداخله ونکړي.»
هغه په ګوتڅنډونکي انداز زیاته کړه: «له یوه لاس څخه ټک نه خېژي، که چېرې یو لوری د بل په چارو کې لاسوهنه کوي، نو لازمه ده چې بل لوری هم د خپل قدرت په اندازه لاسوهنه وکړي، دا به د هیچا په ګټه نه وي.»
هغه په خپلو خبرو کې وویل: « هیڅ ګاونډې باید خپله ابادي د بل ګاونډي په ورانولو کې ونه لټوي، باید اقتصاد محوره اړیکې او یو بل ته متقابل احترام ولرو، تاسې به هم اباد وئ او مونږ به هم، دا زمونږ د ټولو په ګټه ده.»
سلام حنفي، له پاکستان، ایران او نورو ګاونډیو هېوادونو څخه د افغان کډوالو په جبري ډول راستنولو ته په اشاره سره زیاته کړه: « له ټولو افغانانو غواړو چې هېواد ته راستانه شي، مونږ دوی ته په هره برخه کې اسانتیاوې برابروو، د سرحد سیمي له ترانسپورټ څخه تر سرپناه او تجارت پورې.»
د طالبانو د ریاست الوزرا اداري مرستیال عبدالسلام حنفي دا څرګندونې په داسې حال کې کوي چې څو ورځې وړاندې د ترکي ژبو هېوادونو سازمان په یوه کډه اعلامیه کې وویل: «د افغانستان د ثبات لپاره له افغانانو سره د نړیوالو بشري مرستو ملاتړ کوي او د ثبات، پرمختګ او ملي پخلاینې په برخو کې له طالبانو سره کار کولو ته چمتو او په افغانستان کې د ټولګډونه حکومت د جوړېدو غوښتنه کوي.»
د یاد سازمان څرګندونو د طالب چارواکو غوسه راپارولې او دا یې په خپلو چارو کې د ګاونډیو هېوادونو له لوري لاسوهنه ګڼلې ده،
د یادولو وړ ده، چې په افغانستان کې د دغه ډلې حکومت په دوامداره توګه د یو ټولګډونه حکومت د جوړولو او د نجونو زده کړو د بندیز لرې کولو لپاره سیمه ییزې او نړیوالې غوښتنې د «داخلي مسلو» په توګه یادوي.