طالبان: پرون له ایران او پاکستانه تر زرو ډېرې کورنۍ راستنې شوې
د طالبانو تر واک لاندې باختر اژانس خبر ورکړی، چې پرون له ایران او پاکستانه ۱۰۱۹ کورنۍ بېرته افغانستان ته ستنې شوې دي.
د دغه اژانس په راپور کې راغلي، چې له دې ډلې د ننګرهار د تورخم له لارې ۱۲۱ کورنۍ، د کندهار د سپین بولدک له لارې ۸۰ کورنۍ، د نيمروز د ورېښمو پله له لارې ۲۷۸ کورنۍ، د پکتيکا د انګور اډې له لارې دوې کورنۍ، د هلمند د بهرامچې له لارې ۲۳ کورنۍ او د هرات د اسلام کلا له لارې بیا ۵۱۵ کورنۍ بېرته افغانستان ته ستنې شوې دي.
له بل پلوه د پښتونخوا د قبایلي چارو ادارې بیا ویلي، چې تېره ورځ ۷۷۰ تنه کډوال له پاکستانه بېرته افغانستان ته ستانه شوي دي.
د دغه ادارې په خپرې شوې خبرپاڼه کې راغلي، چې له دې ډلې د تورخم له لارې ۱۲۷ د اې سي سي کارت لرونکي او ۶۳۱ بې اسناده کډوال وو.
د خبرپاڼې له مخې؛ تېره ورځ بیا ۱۲ تنه بې اسناده کډوال د انګور اډې له لارې افغانستان ته ستانه شوي دي.
خبرپاڼه زیاتوي، چې له دې ډلې یوازې ۷۱ کسان له اسلام اباد څخه ستانه شوي دي.
له بل پلوه ۱۵ سازمانو په یوه ګډه اعلامیه کې د پاکستان له حکومته غوښتنه کړې، چې په جبري توګه د افغان کډوالو د اېستلو لړۍ دې ژر تر ژره ودروي.
دغو سازمانونو له نړۍوالې ټولنې غوښتنه کړې، چې لیکوالانو، خبریالانو، هنرمندانو او د بشري حقونو فعالانو په ګډون هغو افغانانو ته خوندي ځایونه ور کړي چې د طالبانو له ځورونې تښتېدلي دي.
د اعلامیې له مخې، شاوخوا یو مېلیون پناه غوښتونکي او افغان کډوال د پاکستاني چارواکو د پراخې نیونې، ځورنې او وېره کې ژوند کوي.