د هبتالله اخوندزاده زوی په تصادفي ډول ووژل شو نه په ځانمرګي برید کې
په داسې حال کې چې طالبانو دا ادعا کړې وه ،چې د دوی د مشر ملا هبتالله زوی، خالد عبدالرحمان د «ځانمرګي برید» په ترڅ کې شهید شوی، خو د افغانستان انټرنشنل تازه راپور ښيي چې نوموړی په ځانمرګي برید که نه، بلکې په یوه تصادفي چاودنه کې وژل شوی دی.
د افغانستان انټرنشنل «ملا هبت الله اخوندزاده؛ د اطلاعاتي زندان نهه کلن زنداني» تر سرلیک لاندې تازه راپور ښیي، چې دا پېښه د ۲۰۱۷ کال د جولای په ۲۶مه د هلمند ولایت په ګرشک ولسوالۍ کې هغه مهال رامنځته شوه، چې طالبانو پر امنیتي پوستو او نظامي اډو سخت او پراخ بریدونه پیل کړل. د جګړې په ترڅ کې د «باري» په نوم یوه مهمه نظامي اډه له سخت مقاومت سره مخ شوه او طالبانو هڅه کوله چې دا مرکز د چاودېدونکو توکو په کارولو ونیسي.
خالد عبدالرحمان، چې د طالبانو د ځانمرګو بریدګرو په ځانګړې ډله «قطعه منتظره» سره مل و، ځانمرګی برید ونه کړ. نوموړی هغه مهال ووژل شو چې هڅه یې کوله د اډې پر دفاعي دیوالونو چاودېدونکي توکي ونښلوي، خو مواد ناڅاپه وچاودېدل او هغه یې ځای پر ځای وواژه.
طالبان دا پېښه د «شهادت» په نوم یادوي، خو د دقیقو جزییاتو له مخې، دا یو تصادفي وژل ګڼل کېږي، نه پلان شوی ځانمرګی برید.
هبتالله دغه برید «ځانمرګی» وبلله او طالبانو هم دا پېښه د «شهادت» په نوم یاد کړه او دا یې د خپل مشر د صداقت نښه وبلله. دا موضوع ملا هبتالله د طالبانو په منځ کې لا زیات محبوب کړاو د دې ډلې غړو هغه داسې رهبر وګاڼه چې پر خپلو عقایدو ټینګ ولاړ دی او ان د خپلې کورنۍ د قربانۍ چمتووالی لري.